Түркістан облысында көлік инфрақұрылымын дамыту, елді мекендердің жол сапасын жақсарту және тұрғындарға қолайлы әрі қауіпсіз орта қалыптастыру бағытындағы жұмыстар кезең-кезеңімен жүзеге асырылып келеді. Заманауи талаптарға сай жол желісін қалыптастыру өңірдің әлеуметтік-экономикалық дамуының маңызды басымдықтарының бірі саналады. Бұл бағыттағы жобалар халықтың өмір сүру сапасын арттырып қана қоймай, көлік қатынасын жақсартып, қалалардың инвестициялық және туристік тартымдылығын күшейтуге мүмкіндік беруде.
Осы мақсатта Түркістан қаласында биыл ауқымды жол жөндеу бағдарламасы қолға алынған. Сараптама қорытындысы негізінде 173 көшеге жөндеу жұмыстарын жүргізу жоспарланған. Қазіргі уақытта 20 көшеде асфальт төсеу және жолды жаңғырту жұмыстары қарқынды жүргізілуде.
Жол инфрақұрылымын жаңарту аясында Яссы секторындағы Домалақ ана көшесінде орташа жөндеу жұмыстары жүзеге асырылып жатыр. Ұзындығы 840 метр, ені 6 метр болатын көшеде екі қабатты асфальт-бетон жабынын төсеу және жаяу жүргіншілер жолын салу көзделген. Қазіргі таңда бірінші қабат асфальт жабыны толық төселіп, аяқжол құрылысы аяқталған. Бүгінде екінші қабат асфальтты төсеу жұмыстары жалғасуда. Жоба шілде айының соңына дейін толық аяқталып, тұрғындардың игілігіне беріледі деп жоспарланған.
Сонымен қатар қала аумағында инженерлік инфрақұрылымды жаңғырту жұмыстары аяқталған көшелерді қалпына келтіруге ерекше назар аударылуда. Кәріз жүйелері жүргізілген көшелерде жол жабындарын қайта жаңарту арқылы көлік қозғалысының қауіпсіздігі мен сапасын арттыруға басымдық берілуде. Барлық құрылыс жұмыстары белгіленген техникалық талаптар мен сапа стандарттарына сәйкес жүзеге асырылуда.
Жол инфрақұрылымын жаңғырту тұрғындардың күнделікті тұрмысын жақсартып қана қоймай, көлік қатынасының тиімділігін арттыруға, жаяу жүргіншілер үшін қауіпсіз орта қалыптастыруға және қаланың сәулеттік келбетін жақсартуға мүмкіндік береді. Сонымен бірге бұл жұмыстар логистикалық мүмкіндіктерді кеңейтіп, кәсіпкерлік қызметтің дамуына және туризм саласының өркендеуіне оң ықпал етеді.
Түркістан облысында көлік инфрақұрылымын кешенді дамытуға бағытталған жобалар өңірдің әлеуметтік-экономикалық өсімінің маңызды факторына айналып отыр. Заманауи жолдардың пайдалануға берілуі халықтың өмір сүру сапасын арттырып, елді мекендердің өзара байланысын нығайтуға, инвестициялық тартымдылықты көтеруге және өңірдің орнықты дамуына берік негіз қалыптастыруға ықпал етуде.
