Түркістан облысында халықты жұмыспен қамту және еңбек нарығын дамыту бағытындағы жүйелі жұмыстар өз нәтижесін беріп, өңір бос жұмыс орындарын ұсыну көрсеткіші бойынша еліміздегі көшбасшы аймақтардың қатарына енді. Бұл туралы 2026 жылғы ақпан айындағы Enbek.kz Электрондық еңбек биржасының деректері айғақтайды. Жалпы алғанда, ақпан айында жұмыс берушілер еліміз бойынша шамамен 99 мың бос жұмыс орнын жариялап, 124,9 мың түйіндеме орналастырылған. Қаңтар айымен салыстырғанда бос жұмыс орындарының саны 3,7 пайызға, ал түйіндемелер саны 23,1 пайызға қысқарғанымен, еңбек нарығындағы сұраныс құрылымы тұрақты сақталған. Еңбек нарығындағы негізгі сұраныс әлеуметтік сала мен қызмет көрсету секторына тиесілі. Атап айтқанда, білім беру саласында 26,9 мың, өзге де қызметтер бағытында 14,6 мың, денсаулық сақтау және әлеуметтік қызмет көрсету саласында 9,4 мың, ал өңдеу өнеркәсібінде 8,6 мың бос жұмыс орны тіркелген. Бұл көрсеткіштер өңірлердің әлеуметтік инфрақұрылымының дамуы мен халыққа қызмет көрсету саласының маңыздылығын көрсетеді. Біліктілік деңгейі бойынша бос жұмыс орындарының 44,2 пайызы орта білікті мамандарға, 34,4 пайызы жоғары білікті кадрларға, ал 21,4 пайызы біліктілігі жоқ жұмысшыларға сұранысты құрап отыр. Бұл еңбек нарығында практикалық дағдылар мен кәсіби білімге деген қажеттіліктің жоғары екенін аңғартады. Өңірлік бөліністе бос жұмыс орындарының ең көп шоғырланған аймақтары қатарында Павлодар, Астана, Түркістан, Қарағанды және Алматы облыстары бар. Соның ішінде Түркістан облысы 7,4 мың бос жұмыс орнымен алдыңғы қатардан орын алды. Бұл өңірде өндіріс, қызмет көрсету және әлеуметтік салаларда кадрларға деген сұраныстың жоғары екенін көрсетеді. Сонымен қатар, Түркістан облысы жұмыс іздеушілердің белсенділігі бойынша да көш бастап тұр. Өңір тұрғындары тарапынан 16,8 мың түйіндеме жарияланып, бұл көрсеткіш облыстағы еңбек нарығының жоғары динамикасын айқындайды. Жұмыс іздеушілердің басым бөлігі – 35 жасқа дейінгі жастар, олардың үлесі 42,3 пайызды құрайды. Бұл жастардың еңбек нарығына белсенді араласуын және жаңа мүмкіндіктерге ұмтылысын көрсетеді. Жалақы деңгейі бойынша да еңбек нарығында айтарлықтай айырмашылықтар бар. Жұмыс берушілер тарапынан ең жоғары жалақы мұнай-газ саласындағы инженерлерге (шамамен 3,6 млн теңге), құрылыс саласындағы бас технологтарға (2,8 млн теңге) және материалтану мамандарына (2,2 млн теңге) ұсынылған. Ал жұмыс іздеушілер арасында ұшқыштар, инвестициялық жобалар директорлары және оқу курстарын әзірлеушілер жоғары жалақы күтетін мамандар қатарында. Жалпы алғанда, ақпан айындағы еңбек нарығының көрсеткіштері жұмыс күшіне деген сұраныстың тұрақтылығын және өңірлер арасында, соның ішінде Түркістан облысында еңбек ресурстарының белсенді қозғалысын көрсетеді. Әсіресе әлеуметтік сала, білім беру, денсаулық сақтау және қызмет көрсету бағыттарындағы сұраныс еңбек нарығының негізгі драйвері болып отыр.Түркістан облысы үшін бұл көрсеткіштер өңірдің экономикалық-әлеуметтік дамуының маңызды индикаторы саналады. Жұмыспен қамту деңгейінің артуы, жастардың еңбек нарығына белсенді араласуы және бос жұмыс орындарының көбеюі аймақтың тұрақты дамуына және халықтың әл-ауқатын жақсартуға ықпал етуде.
