Түркістан облысында экономиканы әртараптандыру, инвестиция тарту және туризм саласын дамыту бағытында жүйелі жұмыстар жалғасып келеді. Өңір басшылығы шетелдік инвесторлармен тығыз әріптестік орнату арқылы жаңа жобаларды іске асырып, аймақтың әлеуметтік-экономикалық әлеуетін арттыруға басымдық беруде. Осы мақсатта Түркістан облысы әкімінің орынбасары Қанат Қайыпбек Қытай Халық Республикасынан келген инвесторлармен кездесу өткізіп, екіжақты ынтымақтастықты дамыту мәселелерін талқылады. Кездесу барысында тараптар туризм саласындағы жаңа жобаларды жүзеге асыру, инвестициялық мүмкіндіктерді кеңейту және өзара тиімді әріптестікті нығайту жайын жан-жақты қарастырды. Облыс әкімінің орынбасары өз сөзінде Түркістан өңірінің инвестициялық тартымдылығына тоқталып, шетелдік компаниялар үшін қолайлы жағдайлар жасалғанын атап өтті. Бүгінде өңірде индустриалды және арнайы экономикалық аймақтар жұмыс істеп, инвесторларға түрлі жеңілдіктер ұсынылуда. Сонымен қатар, ауыл шаруашылығы мен өнеркәсіп салаларында Қытай инвесторларының қатысуымен бірқатар ірі жобалар сәтті жүзеге асырылып келеді. Туризм саласы да облыс экономикасының маңызды драйверіне айналып отыр. Осы бағытта ұсынылған жаңа жобалар туристік инфрақұрылымды дамытуға, өңірдің халықаралық деңгейдегі тартымдылығын арттыруға мүмкіндік береді. Атап айтқанда, инвесторлар демалыс аймақтарында заманауи көрініс алаңдарын салу, капсула үлгісіндегі үйлер орнату жобаларын таныстырды. Бұл бастамалар туристерге қолайлы жағдай жасап, қызмет көрсету сапасын арттыруға бағытталған. Шетелдік инвесторлар Түркістан облысының инвестициялық саясатына оң баға беріп, өңірде бизнес жүргізуге барлық қажетті қолдау көрсетіліп жатқанын атап өтті. Сондай-ақ олар ұсынылған жобаларды қысқа мерзімде іске асыруға дайын екендерін білдіріп, құрылыс жұмыстарын бастау үшін жергілікті атқарушы органдар тарапынан қолдау көрсетуді сұрады. Кездесу қорытындысы бойынша тараптар өзара тиімді серіктестікті одан әрі дамытуға уағдаласып, алдағы уақытта бірлескен жобаларды жүзеге асыруға ниет білдірді. Бұл жобалар жаңа жұмыс орындарын ашуға, туристік инфрақұрылымды жетілдіруге және өңір экономикасының тұрақты өсімін қамтамасыз етуге ықпал етеді. Жалпы алғанда, Түркістан облысында жүзеге асырылып жатқан мұндай инвестициялық бастамалар аймақтың әлеуметтік-экономикалық дамуын жеделдетіп, оның халықаралық деңгейдегі беделін арттыруға негіз болуда. Туризм саласына жаңа серпін беретін жобалар өңірдің бәсекеге қабілеттілігін күшейтіп, оны еліміздің маңызды туристік орталықтарының біріне айналдыруға мүмкіндік береді.
