Түркістан облысында экономиканы әртараптандыру, өндірістік әлеуетті арттыру және ауыл шаруашылығы саласын жаңа деңгейге көтеру бағытындағы жобалар кезең-кезеңімен жүзеге асырылуда. Мемлекеттік қолдау мен жеке инвестициялардың нәтижесінде өңірде жаңа өндіріс орындары іске қосылып, экспортқа бағытталған кәсіпорындар көбейіп, әлеуметтік инфрақұрылым жаңғыртылуда. Бұл бастамалар жаңа жұмыс орындарын құрумен қатар, облыстың инвестициялық тартымдылығын күшейтіп, әлеуметтік-экономикалық өсімнің тұрақтылығын қамтамасыз етуде.
Төлеби ауданында іске асырылып жатқан өндірістік жобалардың қатарында заманауи жұмыртқа науаларын өндіретін «AiK.kz» кәсіпорны ерекше орын алады. Жалпы инвестиция көлемі 250 млн теңгені құрайтын өндіріс орны сағатына 2 мың дана өнім шығаруға қауқарлы. Кәсіпорынның іске қосылуы өңірдегі өңдеу өнеркәсібінің дамуына серпін беріп, 20 тұрақты жұмыс орнын ашуға мүмкіндік берді.
Ауыл шаруашылығын әртараптандыру бағытындағы маңызды жобалардың бірі – «Fish House» жауапкершілігі шектеулі серіктестігі. Заманауи технологиялармен жабдықталған кәсіпорын жылына 300 тоннаға дейін балық өнімін өндіреді. Мұнда форель, сазан және ақ амур өсіріліп, ішкі нарықты сапалы өніммен қамтамасыз етуге басымдық берілген. Кәсіпорынның жоғары өндірістік көрсеткіштері мен тиімді жұмыс тәжірибесі нәтижесінде ол Қазақстанның «Ең үздік балық өндірушісі» атағына ие болды. Бұл өңірде акваөсіру саласының қарқынды дамып келе жатқанын көрсетеді.
Өңірде жеңіл өнеркәсіп саласы да тұрақты дамуда. Ленгір қаласында орналасқан «Dana» тігін цехы жыл сайын 150 мың дана жаздық және 90 мың дана қыстық арнайы жұмыс киімін шығарады. Кәсіпорын өнімдері Қазақстанның барлық өңірлеріне жеткізіліп қана қоймай, Ресей нарығына экспортталуда. Бұл жергілікті өндірістің бәсекеге қабілеттілігін арттырып, экспорттық әлеуеттің нығаюына ықпал етуде.
Төлеби ауданындағы агроөнеркәсіп кешенінің ірі жобаларының бірі – «Азия Милк» шаруа қожалығы. Жалпы инвестициялық құны 1 млрд теңгені құрайтын сүт-тауарлы ферма жылына 1300–1350 тонна сүт өндіреді. Қазіргі таңда кәсіпорында 40-тан астам адам тұрақты жұмыспен қамтылған. Өндірістік қуаттың кезең-кезеңімен ұлғаюы нәтижесінде мал басы 636 басқа дейін көбейіп, өңірдегі сүт өндірісінің көлемі артып келеді. Бұл жоба облыстың азық-түлік қауіпсіздігін нығайтып, қайта өңдеу өнеркәсібін дамытуға және ауыл шаруашылығы өнімдерінің қосылған құнын арттыруға мүмкіндік беруде.
Әлеуметтік инфрақұрылымды жаңғырту бағытындағы жұмыстар да жүйелі жалғасуда. Зертас елді мекенінде заманауи спорт кешенінің құрылысы жүргізілуде. Пайдалануға берілгеннен кейін мұнда баскетбол, волейбол, күрес және жаттығу залдары жұмыс істеп, жастардың бұқаралық спортпен айналысуына қолайлы жағдай қалыптасады.
Сонымен қатар аудан орталығында «Төлеби баба» музейінің құрылысы аяқталуға жақын. Жалпы құны 372,2 млн теңгені құрайтын жаңа мәдени нысан өңірдің тарихи-мәдени мұрасын насихаттауға, туристік әлеуетін арттыруға және мәдени инфрақұрылымды дамытуға өз үлесін қоспақ.
