Түркістан облысында адами капиталды дамытуға бағытталған мемлекеттік саясат аясында білім беру саласының инфрақұрылымын жаңғырту жұмыстары жүйелі түрде жүзеге асырылуда. Өңірде білім беру ұйымдарының материалдық-техникалық базасын нығайту, балалар үшін қауіпсіз әрі заманауи білім беру ортасын қалыптастыру және білім сапасын арттыру әлеуметтік-экономикалық дамудың маңызды бағыттарының бірі ретінде айқындалған.
Бүгінде мемлекеттік қолдау нәтижесінде облыс көлемінде 100-ге жуық білім беру ұйымында күрделі және ағымдағы жөндеу жұмыстары жүргізіліп жатыр. Бұл жұмыстар білім беру мекемелерінің қауіпсіздігін күшейтуге, оқу-тәрбие үдерісінің сапасын жақсартуға және балалардың жан-жақты дамуына қолайлы жағдай жасауға бағытталған.
Ордабасы ауданында да білім беру нысандарын кезең-кезеңімен жаңғырту бойынша ауқымды жұмыстар қолға алынған. Мектепке дейінгі ұйымдар мен жалпы білім беретін мектептердің инфрақұрылымын жақсарту, тозығы жеткен ғимараттарды жаңарту және білім беру ұйымдарының заманауи талаптарға сәйкестігін қамтамасыз ету бағытында нақты жобалар жүзеге асырылуда.
Солардың бірі – Бөржар ауылдық округіндегі «Раушан» бөбекжай балабақшасы. 1978 жылы пайдалануға берілген мектепке дейінгі мекемеге күрделі жөндеу жүргізу жоспарланып, тиісті жобалық-сметалық құжаттар әзірленген. Қазіргі таңда бұл балабақшада 120 бүлдіршін тәрбиеленіп жатыр.
Балалардың жазғы демалысын сапалы ұйымдастыру мәселесіне де ерекше көңіл бөлінуде. Осыған байланысты Қажымұқан ауылдық округіндегі Амангелді елді мекенінде орналасқан балалардың жазғы сауықтыру лагерін жаңғырту мәселесі қарастырылып отыр. Нысанды жаңарту балалардың қауіпсіз әрі жайлы демалысын қамтамасыз етуге мүмкіндік береді.
Сонымен қатар Мемлекет басшысының тапсырмасымен жүзеге асырылып жатқан «Келешек мектеп» ұлттық жобасы аясында Ордабасы ауданында жаңа білім беру нысандары пайдалануға берілуде. Бадам ауылдық округінің Ақбұлақ елді мекенінде ашылған 300 орындық «Болашақ» жалпы білім беретін мектебі оқушыларға заманауи талаптарға сай білім алуға барлық қажетті жағдаймен қамтамасыз етілген. Мұндай мектептердің іске қосылуы үш ауысымды оқыту мәселесін шешуге, білім беру сапасын арттыруға және ауылдық жерлердегі әлеуметтік инфрақұрылымды дамытуға зор мүмкіндік береді.
Бұдан бөлек, Қараспан елді мекеніндегі «Айгөлек» бөбекжай балабақшасын жаңғырту жұмыстары да жоспарланған. Қазіргі уақытта нысанға күрделі жөндеу жүргізуге арналған жобалық-сметалық құжаттар дайындалып, тиісті жұмыстарды жүзеге асыру кезеңі басталуда.
Білім беру инфрақұрылымын дамыту жұмыстары ғимараттарды жөндеумен ғана шектелмейді. Өңірде білім сапасын көтеру, балалардың қауіпсіздігін қамтамасыз ету, психологиялық қолдау қызметінің тиімділігін арттыру, білім беру ұйымдарын заманауи құрал-жабдықтармен қамтамасыз ету және жаңа оқу жылына сапалы дайындық жүргізу бағытындағы кешенді шаралар да жүйелі жүзеге асырылуда.
Түркістан облысында білім беру саласына салынған инвестициялар өңірдің әлеуметтік-экономикалық дамуының маңызды факторы болып саналады. Заманауи білім беру инфрақұрылымының қалыптасуы өскелең ұрпақтың сапалы білім алуына жол ашып қана қоймай, адами капиталдың сапасын арттыруға, ауылдық аумақтардың әлеуметтік әлеуетін нығайтуға және өңірдің тұрақты дамуына берік негіз қалайды.
