Түркістан қаласында экономикалық дамуды қолдау және инвестициялық тартымдылықты арттыру мақсатында инфрақұрылымды дамыту және абаттандыру жұмыстары жүйелі түрде жүргізілуде. Қала әкімі Әзімбек Пазылбекұлы аймақтағы маңызды нысандар мен жобалардың құрылыс барысымен танысып, жұмыстардың сапасын және мерзімдерін қатаң бақылауға алуды тапсырды.
Қала аумағында жаңа құрылыс алаңдарында қалдықтарды толық тазалау, нысандардың қоршауларын ретке келтіру және абаттандыру жұмыстары белсенді жүргізілуде. Жауапты сала өкілдерімен тұрақты мониторинг арқылы барлық жұмыстардың сапасы қадағаланып, белгіленген кестеге сәйкес орындалуы қамтамасыз етілуде. Бұл шаралар қаланың көркеюіне ғана емес, инвесторлар үшін қолайлы және сенімді экономикалық орта қалыптастыруға да мүмкіндік береді.
Түркістанның негізгі магистралдық бағыттары бойындағы инфрақұрылымдық және абаттандыру жобалары ерекше назарда. Саттарханов даңғылы мен Әуежай тас жолы бойына 15 000 түп раушан гүлі отырғызылуда, бұл қаланың көркемдігін арттырумен қатар, тұрғындарға жайлы орта қалыптастыруға бағытталған. Жібек жолы тұрғын үй кешеніне апаратын 26-көшеде жол құрылысы жүргізіліп, инфрақұрылым стандарттары мен сапалық талаптарға сәйкес орындалуы қатаң қадағаланып жатыр.
Қаладағы ең ауқымды тұрғын үй жобаларының бірі – 5,2 гектар аумақты қамтитын «Жібек жолы» тұрғын үй кешені. Мұнда 344 пәтерлік арендалдық және кредиттік үйлердің құрылысы жүргізіліп, құрылыс жұмыстарының 75%-ы аяқталды. Жобаның іске асырылуы жаңа жұмыс орындарын құруға, тұрғын үй нарығын дамытуға және экономикалық белсенділікті арттыруға үлес қосады.
Қала әкімінің аралауында арнайы 5000 орындық мешіттің құрылыс және абаттандыру жұмыстары да қаралды. Қасбет, мұнара және инженерлік жүйелер толық дайын, ішкі әрлеу жұмыстары жүргізілуде. Бұл нысан тек діни және мәдени орталық қана емес, аймақтың туристік және әлеуметтік тартымдылығын арттыратын маңызды жобалардың бірі ретінде қарастырылады.
Сонымен қатар, Айналма жол бойында қоршау орнату, Б.Майлин көшесіндегі реконструкциялау жұмыстары және Өндірістік парк пен арнайы экономикалық аймақтағы жобалар ерекше назарға алынды. Мұнда 5000 түп ағаш отырғызылып, кіші өндірістік бес ғимараттың құрылысы және абаттандыру жұмыстары жүргізілуде. Бұл жобалар өңірдің индустриялық және өндірістік әлеуетін арттырып, инвестиция тарту мүмкіндігін күшейтеді.
Қаладағы инфрақұрылымдық жаңғырту және абаттандыру жұмыстары тек көріктендірумен шектелмей, экономикалық даму мен әлеуметтік тұрақтылықты қамтамасыз етуге бағытталған. Жаңа нысандардың іске қосылуы және сапалы инфрақұрылымның қалыптасуы Түркістан қаласын Қазақстандағы инвестициялық және өндірістік әлеуеті жоғары, заманауи мегаполиске айналдыруға мүмкіндік береді.
