Түркістан қаласында соңғы жылдары көлік инфрақұрылымын дамыту бағытында жүйелі жұмыстар жүргізіліп келеді. Қала жолдарының сапасын арттыру мен тұрғындарға қолайлы жағдай қалыптастыру – әкімдік басым бағыттарының бірі.
Бүгінде Түркістан қаласы аумағында жалпы ұзындығы 845 шақырымды құрайтын 875 көше бар. 2024 жылдың қорытындысы бойынша олардың 50,3 пайызы жақсы және қанағаттанарлық жағдайда деп бағаланған. Бұл көрсеткіш қаланың көлік қозғалысы мен логистикалық әлеуетінің айтарлықтай артқанын көрсетеді.
Биыл жол сапасын жақсарту және тұрғындарға ыңғайлы инфрақұрылым қалыптастыру мақсатында қосымша 138,5 шақырым жолды орташа жөндеуден өткізу жоспарланған. Аталған жұмыстар толық орындалған жағдайда, қаладағы жақсы жағдайдағы жолдардың үлесі 66,7 пайызға дейін жетпек.
Жол жөндеу жұмыстары тек жаңа бағыттарды қамтып қана қоймай, қаладағы ең маңызды және халық көп жүретін негізгі көшелерде де жүргізілуде. Атап айтқанда, Тәуке хан көшесі, Әл-Фараби көшесі және М.Тынышқұлов көшесі толық жөндеуден өтті.
Бұл көшелерде заманауи құрылыс талаптары мен стандарттары қатаң сақталып, жол жабынының сапасы мен ұзақ мерзімділігіне баса назар аударылды. Сонымен қатар, жүргіншілердің қауіпсіздігі үшін жаяу жүргінші жолдары мен жарық шамдары жаңартылды.
Жол сапасының жақсаруы – тек көлік қозғалысын жеңілдетіп қана қоймай, экономикалық белсенділікті де арттырады. Сапалы жолдар арқылы кәсіпкерлердің логистикасы жеңілдеп, тұрғындардың күнделікті қатынасы ыңғайлана түседі. Сонымен қатар, жаңа жолдар қала келбетінің ажарын ашып, инвестициялық тартымдылығын арттыруға да оң әсер етеді.
Қала әкімдігі тарапынан барлық құрылыс және жөндеу жұмыстарының сапасына тұрақты бақылау жүргізілуде. Әрбір мердігер ұйымның жұмысы нақты мерзім мен сапа талаптарына сай тексеріліп отырады.
Бүгінгі таңда Түркістандағы жол инфрақұрылымы қарқынды түрде жаңарып, заманауи стандарттарға сай келтірілуде. Биылғы жылдың соңына дейін жүзеге асырылатын жобалар нәтижесінде, қала көшелерінің көпшілігі тегіс, қауіпсіз әрі сапалы жолдармен қамтылмақ.
