Түркістан облысында шекара маңындағы аймақтардың дамуы мен қауіпсіздігін қамтамасыз ету бағытында маңызды комиссиялық отырыс өтті. Облыс әкімінің бірінші орынбасары Зұлпыхар Жолдасовтың төрағалығымен өткен Шекара мәселелері жөніндегі облыстық үйлестіру кеңесіне Ұлттық қауіпсіздік комитеті Шекара қызметі департаментінің басшысы, Төтенше жағдайлар департаменті, Полиция департаменті, «Қазсушар» РМК облыстық филиалы және аудан, қала әкімдіктерінің өкілдері селекторлық режимде қосылды.
Жиында ең басты назар мемлекеттік шекаралық аймақтардың өзекті мәселелеріне аударылды. Атап айтқанда, трансшекаралық өзендер мен су жағалауларының қазіргі жағдайы, су ресурстарын тиімді пайдалану және олардың экологиялық қауіпсіздігін сақтау қарастырылды. ҰҚК Шекара қызметі департаментінің бастығы, ұлттық қауіпсіздік полковнигі Мұхтар Даулетов өз баяндамасында су айдындары мен шекаралық жолдардағы қауіпсіздік шараларының маңыздылығына тоқталды. Сонымен қатар, Мақтаарал және Жетісай аудандарының әкімдері өңірлерінде атқарылып жатқан жұмыстар туралы толық ақпарат берді.
Жиын қорытындысында бірнеше нақты тапсырма берілді. Біріншіден, шекара маңындағы су жағалауларын тазалау және су ресурстарын тиімді пайдалану бағытында аудан әкімдіктері мен «Қазсушар» РМК бірлесіп жүйелі жұмыстар жүргізуге міндеттелді. Бұл шаралар тек экологиялық қауіпсіздікті қамтамасыз етіп қана қоймай, шекаралық сауданың тұрақты және тиімді жүруіне де ықпал етеді.
Екіншіден, шекаралық аймақта мал ұрлығы мен заңсыз әрекеттердің алдын алу үшін алдын алу шараларын күшейту қажеттігі ескерілді. Бұл шаралар жергілікті фермерлер мен кәсіпкерлердің сауда-экономикалық белсенділігін қолдау, мал шаруашылығын қорғау және аймақтың транзиттік әлеуетін арттыруға бағытталған.
Зұлпыхар Жолдасовтың айтуынша, шекаралық аймақтарды дамыту тек қауіпсіздікпен шектелмей, өңірдің экономикалық әлеуетін кеңейтуге, сауда байланыстарын нығайтуға және инвестициялық тартымдылығын арттыруға ықпал етеді. Алдағы уақытта трансшекаралық өзендер мен су ресурстарын цифрлық бақылау жүйесі арқылы басқару, шекарадағы сауда процестерін жеңілдету және аймақтың жалпы инфрақұрылымын жетілдіру жоспарланған.
Бұл отырыс шекара маңындағы аймақтарды кешенді дамыту, су ресурстарын тиімді пайдалану және сауда-логистика саласында жүйелі шешімдер қабылдау үшін маңызды платформаның бірі болды. Түркістан облысы шекаралық аудандарында қауіпсіздік пен экономикалық дамуды қатар қамтамасыз ету жолында нақты қадамдар жасап отыр.
