Түркістан қаласы соңғы жылдары аймақтың әлеуметтік-экономикалық дамуының орталығына айналды. Инфрақұрылымдық жобалар мен тұрғын үй құрылыстарының қарқыны артып, жаңа нысандар бой көтеруде. Бұл өз кезегінде қаланың инвестициялық тартымдылығын арттырып, халықтың өмір сапасын жақсартуға бағытталған тұрақты экономикалық өсімнің айғағы болып отыр. Бүгінгі таңда қала аумағында құрылыс және абаттандыру бағытында ауқымды жұмыстар жүргізілуде. Соның ішінде, «Жібек жолы» тұрғын үй кешенінің құрылысы – қала дамуындағы маңызды жобалардың бірі. Жалпы аумағы 5,2 гектарды құрайтын бұл нысанда 6 арендалық және 3 кредиттік тұрғын үйдің құрылысы жүріп жатыр. Барлығы 512 пәтер тұрғындарға қолжетімді баспана ретінде ұсынылмақ. Құрылыстың орындалу деңгейі бүгінде 75 пайызға жетті. Бұл жоба тек тұрғын үй мәселесін шешіп қана қоймай, жергілікті құрылыс индустриясын, жұмыспен қамтуды және әлеуметтік тұрақтылықты арттыруға да үлес қосуда. Қалада сонымен қатар инженерлік және көше инфрақұрылымын дамыту жұмыстары белсенді жүріп жатыр. 26-шы көше бойында аяқжол төсеу, жиектастар орнату, бетондау және ішкі бөлікке тас төсеу жұмыстары қарқынды жүргізілуде. Мұндай жобалар қала тұрғындарының қауіпсіздігі мен жаяу қатынау қолайлылығын арттыруға бағытталған. Бұдан бөлек, қалалық прокуратураның жаңа ғимаратының құрылысы, 5000 орындық мешіт аумағын абаттандыру, сондай-ақ жабық футбол алаңдарының салынуы – Түркістан қаласының әлеуметтік және мәдени әлеуетін көтеретін маңызды нысандар қатарында. 5000 орындық мешіт аумағында көгалдандыру, жарықтандыру және көркейту жұмыстары жүргізілуде. Бұл тек діни нысан емес, қала тұрғындары мен қонақтарына арналған мәдени-рухани орталыққа айналмақ. Сонымен қатар, Хақназар хан және Ш.Ниязов көшелеріндегі екі жабық футбол алаңының құрылысы 90 пайызға аяқталған. Бұл – қалада спорт инфрақұрылымын кеңейту, жастардың бос уақытын тиімді өткізуге мүмкіндік жасау және салауатты өмір салтын қалыптастыру бағытындағы нақты қадам. Жалпы алғанда, Түркістан қаласында жүргізіліп жатқан құрылыс, көгалдандыру және инфрақұрылымдық жобалар өңірдің экономикалық белсенділігін арттырып, инвестициялық және туристік тартымдылығын күшейтуде. Бүгінгі Түркістан – жаңа экономика, заманауи инфрақұрылым және тұрақты дамуға бағыт алған қала. Ал іске асырылып жатқан әрбір жоба – өңірдің әлеуметтік әл-ауқатын арттыру мен өзін-өзі қамтамасыз етуге бағытталған нақты нәтиже.
Әлемге көзқарасыңды өзгертетін Janalyqtar!
