Түркістан қаласында мүгедектігі бар азаматтардың өмір сүру сапасын арттыру, олардың қоғамға толыққанды бейімделуін қамтамасыз ету және денсаулығын қалпына келтіру бағытында жүйелі жұмыстар жүргізілуде. Бүгінгі таңда қала бойынша 12 229 мүгедектігі бар азамат тіркелген. Бұл санаттағы тұрғындарды әлеуметтік қорғау – жергілікті атқарушы органдар мен мемлекет үшін басым бағыттардың бірі.
Аталған мақсатта мүгедектігі бар азаматтарға арналған кешенді оңалту шаралары іске асырылуда. Қазіргі уақытта 8 579 адамға арналған 12 401 техникалық және өзге де оңалту құралын қамтитын оңалтудың жеке бағдарламалары әзірленіп, бекітілген. Бұл бағдарламалар әр азаматтың жеке қажеттіліктері мен мүмкіндіктерін ескере отырып жасалып, медициналық, әлеуметтік және кәсіби оңалту бағыттарын толық қамтиды.
Оңалту бағдарламалары аясында протездік-ортопедиялық бұйымдармен, қозғалу құралдарымен, арнайы гигиеналық жабдықтармен қамтамасыз ету, сондай-ақ есту және көру қабілетін түзетуге арналған техникалық құралдар беру қарастырылған. Бұдан бөлек, мүгедектігі бар азаматтар санаторлық-курорттық емдеуден өтіп, әлеуметтік қызмет түрлерін алу мүмкіндігіне ие.
Бұл шаралар мүгедектігі бар адамдардың күнделікті өмірін жеңілдетіп қана қоймай, олардың өз-өзіне қызмет көрсету деңгейін арттыруға, еңбекке қабілеттілігін қалпына келтіруге және қоғам өміріне белсенді араласуына жағдай жасайды. Инклюзивті орта қалыптастыру арқылы олардың әлеуметтік оқшаулануын азайтуға да ерекше көңіл бөлінуде.
Алдағы кезеңде Түркістан қаласында мүгедектігі бар азаматтарды әлеуметтік қорғау, жұмыспен қамтуға тарту және олардың әлеуетін толық іске асыру бағытындағы жұмыстар кезең-кезеңімен жалғасын табады. Мемлекет тарапынан көрсетіліп отырған қолдау шаралары қалада әлеуметтік әділеттілікті нығайтып, әрбір азаматтың лайықты өмір сүруіне мүмкіндік беретін маңызды қадам болып отыр.
