Жетісай ауданында ауыл шаруашылығы мен көлік инфрақұрылымын жаңғырту арқылы экономикалық тұрақтылық пен инвестициялық тартымдылықты арттыру бағытында жүйелі жұмыстар атқарылуда.
Қарақай ауылдық округінде жүргізіліп жатқан ағын су арналарының механикалық тазалануы мен жол жөндеу жұмыстары – осы бағыттағы тиімді шешімдердің бірі. Атап айтқанда, К-МО-1, К-МО-1-1, К-МО-1-1-1, К-23 және К-23-5 каналдары тазартылып, дихандарға суды жеткізу жеңілдеді. Бұл ауыл шаруашылығындағы өнімділікті арттырып, инвестиция тартуға қолайлы аграрлық орта қалыптастыруға жол ашуда. Ауылдың негізгі көшелеріне орташа жөндеу жұмыстары жүргізіліп, жергілікті кәсіпкерлер мен құрылыс ұйымдарына жаңа тапсырыстар берілді. Осылайша, инфрақұрылымдық жобалар жұмыс орындарын көбейтіп, жергілікті экономиканың айналымын арттыруға ықпал етуде.
Кетебай елді мекенінде 14 миллион теңгеге спорт алаңының құрылысы басталып, ауыл жастары үшін бос уақытты тиімді өткізуге жағдай жасалуда. Мұндай нысандар — инвестициялық және әлеуметтік дамудың үйлесімін көрсететін маңызды элемент. Қарақайдағы жобалардың барлығы мемлекеттік және жеке инвестицияларды тиімді үйлестірудің нәтижесінде жүзеге асуда. Бұл – елді мекендердің инфрақұрылымын жаңғыртумен қатар, инвесторлар үшін қолайлы экономикалық орта қалыптастыруға мүмкіндік беріп отыр.
Кездесу соңында аудан басшысы тұрғындарды жеке қабылдап, ауылдың дамуына қатысты жаңа ұсыныстарды талқылады. Бұл диалог форматы жергілікті билік пен халық арасындағы сенімді арттырып, инвестициялық ахуалды жақсартуға бағытталған нақты тетіктерді іске қосуға жол ашуда. Қарақай ауылдық округінде атқарылып жатқан жұмыстар — бұл жай ғана инфрақұрылымдық жобалар емес, бұл аймақтық экономиканы дамыту мен ауылға инвестиция тартудың жарқын үлгісі.
