Мемлекет басшысы Қасым-Жомарт Тоқаевтың халыққа Жолдауында атап өткен негізгі басым бағыттардың бірі – инвестиция тарту және жаңа жұмыс орындарын ашу арқылы экономиканы әртараптандыру. Бұл міндет елдің әр өңірінде нақты іспен жүзеге асып келеді. Соның айғағы – Түркістан облысының Сарыағаш ауданында қолға алынған өндірістік парк жобасы.
Түркістан облысының әкімі Нұралхан Көшеровтің тапсырмасымен өңірдегі барлық аудан мен қалада өндірістік парктер құру бастамасы жүзеге асуда. Бұл бастама — кәсіпкерлік ортаны дамытып, өңір экономикасына серпін беретін стратегиялық қадам. Сарыағаш ауданында өндірістік парк құрылысы үшін ауданның кіреберісінен 6,5 гектар жер телімі бөлінді. Қазіргі уақытта мұнда жер тегістеу және инфрақұрылымға қажетті дайындық жұмыстары жүргізілуде. Жоба бірнеше кезеңнен тұрады және оның әрбір сатысы аудан басшысы Арман Абдуллаевтың жіті бақылауында. Өндірістік парктің басты мақсаты — жергілікті кәсіпкерлерге тиімді орта қалыптастырып, өндіріс орындарын шоғырландыру, оларға дайын инфрақұрылымы бар алаң ұсыну. Бұл — шағын және орта бизнесті дамыту, жаңа инвестициялар тарту және жергілікті тұрғындарды тұрақты жұмыспен қамтуға бағытталған маңызды бастама.
Парктің аумағында болашақта өндірістік, қоймалық және сервистік аймақтар, сондай-ақ кәсіпкерлерге арналған инженерлік-коммуникациялық инфрақұрылым (жол, электр, су, кәріз, газ желілері) толықтай қамтамасыз етіледі. Бұл өз кезегінде инвесторлардың келуіне қолайлы жағдай туғызып, ауданның экономикалық белсенділігін арттырады. Сарыағаш ауданының географиялық орналасуы да бұл жобаның стратегиялық маңызын күшейтеді. Себебі аудан республиканың оңтүстіктегі ірі сауда және транзиттік хабтарының бірі, халықаралық шекара маңында орналасқан. Осылайша, өндірістік парк алдағы уақытта экспорттық әлеуеті жоғары өңірлік өндіріс орталығына айналмақ. Мұндай жобалар — ел экономикасының жаңа үлгісін қалыптастырудың нақты көрінісі. Инфрақұрылым мен кәсіпкерлік қатар дамыған жерде экономикалық тұрақтылық пен халықтың әл-ауқаты артады. Сарыағаштағы өндірістік парк — бұл тек құрылыс нысаны емес, өңірдің болашақ экономикалық өркендеуінің іргетасы. Алдағы уақытта мұнда жаңа кәсіпорындар ашылып, жүздеген адам тұрақты жұмыспен қамтылып, ауданның өндірістік әлеуеті жаңа деңгейге көтеріледі.
