Түркістан облысында өңір экономикасын әртараптандыру, өнеркәсіп өндірісін дамыту, инвестициялық тартымдылықты арттыру және халықты тұрақты жұмыспен қамту бағытындағы жүйелі жұмыстар өз нәтижесін беруде. Мемлекет басшысының өңдеу өнеркәсібін дамыту, шағын және орта бизнесті қолдау, өндірістік инфрақұрылымды жетілдіру жөніндегі тапсырмалары аясында облыстың барлық аудан-қалаларында жаңа өндіріс орындары ашылып, инвестициялық жобалар кезең-кезеңімен жүзеге асырылуда. Соның жарқын үлгісінің бірі – Ордабасы ауданындағы «Темірлан» өндірістік паркі.
Бүгінде «Темірлан» өндірістік паркі ауданның индустриялық дамуының негізгі тіректерінің біріне айналып келеді. Бұл өндірістік алаң кәсіпкерлерге дайын инфрақұрылымы бар қолайлы орта ұсынып, жаңа өндірістердің ашылуына, инновациялық жобалардың жүзеге асуына және жергілікті экономиканың дамуына тың серпін беруде. Мұнда іске асырылып жатқан жобалар импортты алмастыру, өңірде өндірілетін өнім көлемін ұлғайту және ішкі нарықты отандық тауарлармен қамтамасыз ету бағытындағы маңызды қадамдардың бірі саналады.
Жалпы аумағы 10 гектарды құрайтын өндірістік парктің алғашқы кезеңінде әрқайсысының көлемі 480 шаршы метр болатын бес өндірістік ангардың құрылысы толық аяқталып, пайдалануға берілді. Жалпы өндірістік алаңы 2400 шаршы метрді құрайтын бұл кешен бүгінде кәсіпкерлердің өндірісті қысқа мерзімде іске қосуына мүмкіндік беретін заманауи өндірістік алаң ретінде қалыптасып отыр.
Қазіргі таңда өндірістік парк аумағында жалпы инвестициялық құны 1,6 миллиард теңгені құрайтын бес кіші қуатты өндірістік жоба жүзеге асырылуда. Аталған жобалардың нәтижесінде 48 жаңа тұрақты жұмыс орны ашылып, аудан тұрғындарын жұмыспен қамтуға және халықтың әл-ауқатын арттыруға елеулі үлес қосылады. Бұл көрсеткіштер Ордабасы ауданында өндірістік сектордың дамып келе жатқанын және инвесторлар үшін қолайлы жағдай жасалғанын айқын көрсетеді.
Өндірістік парктің тиімді жұмыс істеуі үшін барлық қажетті инженерлік-коммуникациялық инфрақұрылым қалыптастырылған. Электрмен жабдықтау мақсатында 320 киловатт қуатқа техникалық шарт алынып, толық электр желілері жүргізілген. Сонымен қатар өнімділігі сағатына 50 текше метр болатын ұңғыма қазылып, сапалы ауыз су жүйесі тартылған. Кәсіпкерлердің логистикалық мүмкіндіктерін жақсарту мақсатында паркке дейін ұзындығы 2,8 шақырым болатын асфальт жол салынды. Ал өткізу қабілеті сағатына 1540 текше метрді құрайтын жоғары қысымды табиғи газ құбырының жобасы мемлекеттік сараптамадан өтіп жатыр. Бұл өндірістік парктің қуатын арттырып, болашақта жаңа кәсіпорындарды орналастыруға мүмкіндік береді.
Өндірістік паркке орналасқан кәсіпорындар әртүрлі салаларды қамтып, өңдеу өнеркәсібінің дамуына үлес қосуда. Атап айтқанда, «Ayala» жауапкершілігі шектеулі серіктестігі сұйық және ұнтақ кір жуғыш заттар өндірісін іске қосып, тұрмыстық химия өнімдерін шығара бастады. Ал «ALMEN GROUP» жауапкершілігі шектеулі серіктестігі ұнтақ кір жуғыш заттарды өндіру және қаптау жұмыстарын жүргізуде.
Сонымен қатар «Биляль-Халид» жауапкершілігі шектеулі серіктестігі гидропоника технологиясы арқылы ауыл шаруашылығы өнімдерін өсіру, түйіршіктелген мал азығын өндіру және көкөніс өнімдерін консервілеу бағытындағы жобаларын жүзеге асыруда. Бұл жоба өңірдің агроөнеркәсіп кешенінде заманауи технологияларды енгізуге және азық-түлік қауіпсіздігін қамтамасыз етуге ықпал етеді.
Өндірістік парк аумағында «ҚАРАБАТЫР АГРО» жауапкершілігі шектеулі серіктестігі металл бұйымдарын өндіруге дайындық жүргізіп жатса, «FACADE COMPANY» жауапкершілігі шектеулі серіктестігі құрылыс саласында сұранысқа ие шыны өнімдерін шығаратын өндірістік желілерді іске қосу-баптау жұмыстарын жүргізуде. Бұл кәсіпорындардың іске қосылуы құрылыс индустриясының дамуына және отандық өнім көлемінің артуына оң ықпал етеді.
Түркістан облысында өндірістік парктерді дамыту – өңірдің әлеуметтік-экономикалық саясатының маңызды бағыттарының бірі. Мұндай өндірістік алаңдар кәсіпкерлердің шығынын азайтып, жаңа жобаларды қысқа мерзімде жүзеге асыруға мүмкіндік береді. Сонымен қатар өндіріс орындарының көбеюі салық түсімдерінің артуына, жаңа технологиялардың енгізілуіне, жергілікті кадрлардың біліктілігінің жоғарылауына және халықты тұрақты жұмыспен қамтуға ықпал етеді.
«Темірлан» өндірістік паркінде жүзеге асырылып жатқан жобалар Ордабасы ауданының ғана емес, тұтас Түркістан облысының өндірістік әлеуетін нығайтып келеді. Инвестициялық белсенділіктің артуы өңір экономикасының тұрақты өсіміне жол ашып, кәсіпкерліктің дамуына қолайлы экожүйе қалыптастыруда. Бұл өз кезегінде облыстың өнеркәсіп өнімінің көлемін ұлғайтып, экспортқа бағдарланған өндірістердің қалыптасуына және өңдеу өнеркәсібінің үлесін арттыруға мүмкіндік береді.
Алдағы уақытта өндірістік парктің инфрақұрылымын одан әрі жетілдіру, жаңа инвестициялық жобаларды тарту және өндіріс орындарының санын көбейту жоспарланып отыр. Бұл жұмыстар Ордабасы ауданын Түркістан облысының өндірістік орталықтарының біріне айналдырып, өңірдің әлеуметтік-экономикалық дамуына, халықтың әл-ауқатының артуына және ел экономикасының тұрақты өсуіне елеулі үлес қоспақ.
