Қоғамның басты байлығы – жастар. Олардың дұрыс бағыт таңдап, өмірлік жолын сеніммен бастауына жағдай жасау – бүгінгі күннің ең өзекті міндеттерінің бірі. Осы мақсатта Шымкент қаласында жүзеге асып жатқан «Болашаққа қадам» жобасы аясында №58 жалпы орта мектептің бітіруші түлектерімен кезекті маңызды кездесу өтті.
Түлектер үшін тағылымды сәт
Мектеп қабырғасынан үлкен өмірге қадам басқалы отырған жас түлектер үшін бұл кездесу айрықша маңызға ие болды. Өйткені мұнда тек кәсіби бағдар беру ғана емес, сонымен қатар, алдағы сынақтардан сүрінбей өтуге психологиялық тұрғыдан дайын болудың қыр-сыры да кеңінен түсіндірілді.
Кездесуге арнайы шақырылған тәжірибелі психолог мамандар жас түлектермен ашық әңгімелесіп, олардың мазалаған сауалдарына жауап берді. Жастардың болашақ мамандықты таңдауда өз қабілеті мен қызығушылығын ескеруі керектігіне баса назар аударылды.
Психологиялық қолдау мен кәсіби бағдар
Мамандар емтихан алдындағы толқу мен күйзелісті еңсерудің тиімді тәсілдерімен бөлісті. Оқушыларға дұрыс күн тәртібін құру, уақытты тиімді пайдалану, мотивацияны жоғалтпау және стрессті басқарудың психологиялық әдістері үйретілді. Сонымен қатар, болашақта қателеспей мамандық таңдаудың жолдары да нақты мысалдармен түсіндірілді.
– «Әрбір жас өз болашағына сеніммен қадам басуы үшін, ең алдымен өз мүмкіндігін дұрыс бағамдауы қажет. Ал мамандықты жүрек қалауымен таңдау – табысты өмірдің кепілі», – деді психолог-маманның бірі.
Жастарға дем берер жоба
Жиын соңында түлектер ұйымдастырушыларға ризашылығын білдіріп, алған пайдалы кеңестері олардың үлкен өмірге сенімді түрде қадам жасауына дем беретінін атап өтті.
«Болашаққа қадам» жобасы Шымкент қаласының жастарына жан-жақты қолдау көрсетіп келеді. Алдағы уақытта бұл бастама аясында түрлі мектептерде кездесулер мен тренингтер жалғасын таппақ. Жобаның басты мақсаты – өскелең ұрпақтың өмірлік бағыт-бағдарын дұрыс айқындауына көмектесіп, олардың сенімді әрі табысты болашағын қалыптастыруына ықпал ету.
