Шымкент қаласы жыл сайынғы аумақтық даму жоспарына сәйкес, тұрғындарға қолайлы және қауіпсіз ортаны қамтамасыз ету мақсатында көшелерді жарықтандыру жұмыстарын жүйелі түрде жүргізіп келеді. Биыл қала көшелерін жарықтандыру ауқымды жоба ретінде қолға алынып, 1800-ге жуық көшеге жалпы саны 35 218 жарық шамы орнатылды. Осы жұмыстардың толық аяқталуымен жыл соңына дейін қала көшелері 100% жарықтандырылатын болады, бұл тұрғындардың қауіпсіздігін қамтамасыз етумен қатар, қала инфрақұрылымын заманауи стандарттарға сәйкестендіруге бағытталған маңызды қадам болып отыр. Жұмыс нәтижесінде әр аудан бойынша келесі көрсеткіштер орындалды: Абай ауданында 721 көшеге 12 787 жарық шамы орнатылып, инфрақұрылымдық жағдай елеулі жақсарды. Әл-Фараби ауданында 72 көшеге 776 шам, Еңбекші ауданында 239 көшеге 7 096 шам, Қаратау ауданында 413 көшеге 10 253 шам және Тұран ауданында 313 көшеге 4 306 жарық шамы қойылды. Бұл көрсеткіштер қала көшелерінің толық жарықтандырылуына жақындағанын дәлелдейді. Шамдардың орнатылуы тек қана көше мен жол қозғалысын жарықтандырумен шектелмей, тұрғындардың түнгі уақытта да қауіпсіз қозғалуына мүмкіндік береді. Сонымен қатар, жарықтандыру қалалық орта сапасын арттыруға, тұрғындар мен қала қонақтарына ыңғайлы және заманауи инфрақұрылым жасауға бағытталған кешенді шаралардың бірі болып табылады. Жыл соңына дейін тағы 985 көшеге жарық шамдары орнатылып, жалпы көрсеткіш 100%-ға жеткізіледі деп жоспарланған. Орнатылған шамдар кейіннен Шымкент қаласының Энергетика және инфрақұрылым басқармасының теңгеріміне беріліп, жүйелі күтім мен техникалық қызмет көрсету арқылы тұрақты жұмыс істейтін болады. Айта кету керек, 2024 жылы қала аумағындағы 1 238 көшеге 33 422 жарық шамы орнатылып, толық іске қосылған, бұл да қала аумағын дамытудағы жүйелі, жоспарлы жұмыстардың айқын көрінісі болды. Жарықтандыру жобасы қаланың аумақтық даму стратегиясына тікелей байланысты. Қаланың әр ауданына заманауи инфрақұрылым элементтерін енгізу – тұрғындар өмірінің қауіпсіздігі мен жайлылығын арттырудың негізгі бағыттарының бірі. Жол шамдарының орнатылуы, әсіресе, жол қозғалысы мен жаяу жүргіншілердің қауіпсіздігі үшін маңызды. Сонымен қатар, бұл шара қалалық ортаның эстетикалық көрінісін жақсартуға, қоғамдық кеңістікті заманауи талаптарға сай бейімдеуге мүмкіндік береді.
Әлемге көзқарасыңды өзгертетін Janalyqtar!
