Шымкент қаласында қоғамдық тәртіпті сақтау, құқық бұзушылықтардың алдын алу және тұрғындардың қауіпсіздігін арттыру бағытындағы жұмыс қарқын алып келеді. Мемлекет басшысының «Заман талабына сай құқық қорғау органдарының ашықтығын, жеделдігін және тиімділігін қамтамасыз ету» жөніндегі тапсырмаларын орындау мақсатында қалада бірқатар заманауи технологиялық шешімдер енгізілуде. Сол жаңашылдықтың бірі – Еңбекші ауданында «Учаске» профилактикалық іс-шарасы аясында жүргізіліп жатқан әуе патрулі. Пилотсыз басқарылатын дрондар арқылы аумақты жоғары нүктеден бақылау құқық бұзушылықтың алдын алуда тиімді механизмге айналып отыр.Учаскелік инспекторлардың айтуынша, дрондар жасырын және көз жетпейтін аумақтарды анық көруге мүмкіндік береді. Әуе бақылауы тұрмыстық құқық бұзушылықтар, қоғамдық тәртіпті бұзу және профилактикалық қаупі бар жағдайларды жедел тіркеуге жол ашады. Түсірілген бейнематериал оқиға бойынша дәлел ретінде қолданылып, жұмыстың сапасы мен ашықтығын арттырады. Қоғамдық қауіпсіздікті күшейту тек бақылаумен шектелмейді. «Учаске» іс-шарасы барысында тәртіп сақшылары тұрғындармен кездесіп, құқықтық сауаттылықты арттыруға бағытталған түсіндіру жұмыстарын жүргізуде. Азаматтарға өз құқықтары мен міндеттері, тұрмыстық жанжалдардың алдын алу жолдары, отбасылық және қоғамдық тәртіпке қатысты заңнамалық нормалар түсіндіріледі. Бұл – құқық бұзушылықтың себептерін қашықтан бақылап қана қоймай, оны дер кезінде түсіндіру, алдын алу және болдырмау арқылы жүйелі түрде жұмыс істеудің жаңа форматы. Шымкент қаласының құқық қорғау органдары алдағы уақытта да технологиялық құралдарды кеңінен қолданатынын атап өтуде. Дрондармен жүргізілетін рейдтердің нәтижесі олардың тиімділігін көрсетті. Мұндай тәсіл қауіпсіздікті күшейтіп, полиция қызметінің ашықтығы мен сенімділігін арттырады. Қоғамдық қауіпсіздік — тек полицияның емес, бүкіл қоғамның ортақ жауапкершілігі. Сондықтан тұрғындардың құқықтық мәдениетін көтеру, заң талабын түсіндіру және құқық бұзушылықтың алдын алу жұмыстары қалада жүйелі жүргізілетін болады. Шымкенттегі «заң мен тәртіп» бағыты цифрлық бақылау мен құқықтық ағартуды үйлестіре отырып, жаңа деңгейге көтеріліп отыр. Бұл – қаладағы тұрақтылықты қамтамасыз етуге, азаматтардың қауіпсіз өмір сүруіне, құқықтық мәдениеті жоғары орта қалыптастыруға бағытталған маңызды қадам.
Әлемге көзқарасыңды өзгертетін Janalyqtar!
