Шымкент қаласы соңғы жылдары инфрақұрылымды дамытуға, тұрғындар үшін қолайлы ортаны қалыптастыруға бағытталған ауқымды жобаларды үздіксіз жүзеге асырып келеді. Қала ішіндегі қозғалысты жеңілдету, көлік жүйесін жаңарту және жол инфрақұрылымын халықаралық стандарттарға бейімдеу — шаһардың даму стратегиясының негізгі бағыттарының бірі. Сол бастамалардың ішіндегі ең маңызды жобалардың бірі – Қонаев даңғылының ІІ кезеңінің құрылысы. Бүгінде бұл кезең толық аяқталып, қала тұрғындарының игілігіне ұсынылды. Жаңа бөлік Әйтеке би көшесінен Терешкова көшесіне дейінгі аралықты қамтиды. Стратегиялық маңызы аса жоғары бұл бағыт қаланың көлік картасын жаңаша қалыптастыруда ерекше рөл атқарады. Қонаев даңғылы — қала орталығын жаңа шағынаудандармен байланыстыратын негізгі магистралдардың бірі. Осы жобаның жалғасы орталықтағы қозғалыс жүктемесін азайтып, көлік ағынын тиімді басқаруға мүмкіндік береді. Даңғыл 4 жолақты етіп салынған. Жол құрылысы кезінде қозғалыс қауіпсіздігіне, жүргізушілер мен жаяу жүргіншілердің қолайлығына айрықша назар аударылды. Барлық құрылыс және абаттандыру кезеңдері толық аяқталып, заманауи қалалық инфрақұрылымның барлық талаптары ескерілді. Қазіргі таңда, жол жиектері мен айналасы көгалдандырылды, қажетті жол таңбалары толық сызылды, көше бойындағы жарықшамдар іске қосылды, туннель астына Шымкенттің брендіне айналған қызғалдақ мүсіні орнатылды.
Бұл тек жол емес — қаланың эстетикасын арттыратын, заманауи мегаполис бейнесін айшықтайтын инфрақұрылымдық кеңістік. Қонаев даңғылының ІІ кезеңінің іске қосылуы Шымкенттің көлік логистикасын айтарлықтай оңтайландырады. Әсіресе таңертеңгі және кешкі қарбалас кезінде орталық аумақтардағы кептелісті біршама азайтып, тұрғындардың уақытын үнемдеуге сеп болады. Сонымен бірге бұл бағыт қаладағы жаңа экономикалық аумақтарды дамытуға, жаңа құрылыстардың бой көтеруіне және инфрақұрылымның кеңеюіне жол ашады. Жоба — Шымкенттің тез дамып келе жатқан мегаполис екенін дәлелдейтін маңызды қадамдардың бірі. Қала күн сайын көркейіп, жаңа нысандар бой көтеріп, инфрақұрылымы жаңарып келеді. Қонаев даңғылының жаңа бөлігі — осы өзгерістердің айқын көрінісі. Заманауи, қауіпсіз әрі көрікті жол бөлігі қала тұрғындарына қолайлы жағдай жасап қана қоймай, Шымкенттің келешек дамуында маңызды орын алады. Қорыта айтқанда, Қонаев даңғылының ІІ кезеңінің пайдалануға берілуі — Шымкенттің урбанистік дамуының кезекті белесі. Бұл жобаның аяқталуы қаланың көркеюіне, қозғалыс мәдениетінің жақсаруына және тұрғындардың өмір сапасының артуына зор үлес қосады.
