Шымкент қаласы тұрғындарының өмір сүру сапасын арттыру, инженерлік инфрақұрылымды жаңғырту және қаланы әлеуметтік-экономикалық тұрғыдан дамыту бағытында ауқымды жұмыстар жүргізілуде. Сол мақсатта қала әкімінің бастамасымен Тассай шағынауданының тұрғындарына табиғи газ жеткізу жобасының екінші кезеңі іске асырылуда. Қала әкімдігі мен мердігер ұйымдардың бірлескен еңбегі нәтижесінде жобаның екінші кезеңінде 1 700 абонентке көгілдір отын жеткізіледі. Бұл – тұрғындар үшін күнделікті тұрмыста қолжетімділік пен қауіпсіздікті қамтамасыз ететін маңызды жаңалық. Бұған дейінгі бірінші кезеңді жүзеге асыру аясында 800 абонент табиғи газды пайдаланып келеді, ал жыл соңына дейін қалған үйлерді коммуналды игілікке қосу жоспарлануда. Шымкент қаласының әкімі Ғабит Сыздықбеков шара барысында тұрғындармен кездесіп, табиғи газбен қамтамасыз ету – халықтың әл-ауқатын арттырудағы маңызды қадам екенін атап өтті. «Президенттің тапсырмасына сәйкес, біз қала тұрғындарына қолжетімді және сапалы инженерлік инфрақұрылым жасауға ерекше көңіл бөлеміз. Табиғи газбен қамтамасыз ету тек тұрмысты жеңілдетіп қана қоймай, экологиялық тұрғыдан да маңызды – көмір және сұйытылған газды қолданудың азаюы қаланың ауасын жақсартуға септігін тигізеді», – деді қала әкімі. Жобаның іске асуы тұрғындардың әлеуметтік жағдайын жақсартуға, тұрмыс сапасын арттыруға және шағынауданның дамуына серпін береді. Заманауи инженерлік желілер тұрғындарға қауіпсіздік пен жайлылықты қамтамасыз етеді, ал коммуналдық инфрақұрылымның жаңартылуы қала аумағының дамуына тікелей әсер етеді. Сонымен қатар, табиғи газға қосылу мүмкіндігі тұрғындарға энергияны үнемдеуге және экономикалық шығындарын азайтуға мүмкіндік береді, бұл шағын және орта бизнес субъектілерінің қызметіне де оң әсерін тигізеді. Газға қосылу үшін тұрғындар техникалық шарттарды алу мақсатында egov мобильді қосымшасы немесе электрондық үкімет порталы арқылы өтініш бере алады. Бұл қызмет көрсету тәсілі тұрғындардың уақытын үнемдеп, әкімдік тарапынан ұсынылып отырған заманауи қызмет көрсету формасының үлгісі болып табылады. Тассай шағынауданында жүзеге асырылып жатқан бұл жоба – Шымкент қаласының аумақтық даму стратегиясының маңызды бөлігі болып табылады. Жобаның толық іске асуы тұрғындардың өмір сүру деңгейін көтеріп, қала ортасын ыңғайлы етуге, халықтың әлеуметтік әл-ауқатын арттыруға және шағынауданның тұрақты дамуына мүмкіндік береді. Табиғи газбен қамтамасыз ету – қаланың жалпы инфрақұрылымын жетілдіру, экологиялық тепе-теңдікті сақтау және мегаполистің тұрақты дамуына қосқан нақты үлес болып табылады.
