Шымкент қаласының барлық аумағында абаттандыру мен көгалдандыру жұмыстары жүйелі түрде жалғасып келеді. Соңғы жылдары қала тұрғындары үшін жайлы орта қалыптастыру, экологиялық ахуалды жақсарту және жаңа демалыс аймақтарын көбейту бағытында ауқымды жобалар іске асуда. Осы жұмыстардың жарқын көрінісі – Абай ауданында қолға алынған жаңа гүлзарлар мен демалыс орындарының құрылысы. Биыл жоспарға сәйкес Абай ауданында 5 жаңа әмбебап демалыс орны салынуда. Бұл нысандар Достық шағынауданындағы Ақбосаға және Ақсу-Аюлы көшелерінде, Қызылжар шағынауданындағы Тоқбәйге көшесінде, Нұршуақтағы Миялы көшесінде және Асар-2 шағынауданындағы Нұр жол көшесінде бой көтеруде. Құрылыс жұмыстары бүгінде қарқынды жүргізіліп, кейбір демалыс орындары тұрғындардың игілігіне пайдалануға берілді. Бұл — ауданның келбетін жаңғыртып, тұрғындар үшін жаңа тыныс сыйлайтын маңызды қадам. Сонымен қатар Асар шағынауданындағы тозығы жеткен 4 гүлзар жаңартылып жатыр. Бұл аумақтарда көгалды аймақтар кеңейтіліп, заманауи ландшафттық элементтер орнатылуда. Көпшілікке арналған жаңа орындар балалар мен ересектерге бірдей қолайлы демалыс аймағына айналады. Абаттандыру жұмыстары аясында жалпы 9 400 шаршы метр жерге көгал төселді. Бұл қаланың жасыл белдеуін кеңейтуге айтарлықтай үлес қосады. Сонымен бірге 850 түп қарағаш және 100 түп шырша көшеті отырғызылды. Мұндай жасыл екпелер шаһардың ауа сапасын жақсартып қана қоймай, табиғи тепе-теңдікті сақтау мен қала экологиясына оң әсерін тигізеді. Жаңадан салынып жатқан гүлзарлар — тек көріктендіру нысандары емес. Олар — қала тұрғындары үшін таза ауада серуендеу, спортпен айналысу, балалардың ойыны мен отбасылық демалысқа арналған жаңа қауіпсіз әрі тартымды кеңістіктер. Бұл бағыттағы жұмыстар Шымкенттің жасыл, жайлы және заманауи қала ретінде қалыптасуына зор үлес қосуда. Абай ауданында жүргізіліп жатқан кешенді абаттандыру шаралары — Шымкенттің көркеюіне бағытталған жүйелі жұмыстың бір бөлігі. Жаңа гүлзарлар, көгалды аймақтар мен жасыл екпелер қаланың эстетикалық келбетін айшықтап, тұрғындардың өмір сапасын арттыруға ықпал етуде. Алдағы уақытта да осындай жобалар қала аумағында кеңейіп, Шымкенттің жасыл қала ретіндегі мәртебесін нығайта түсері сөзсіз.
Әлемге көзқарасыңды өзгертетін Janalyqtar!
