Шымкентте «Жұлдыз» индустриялық аймағында «Vostok Trade LLP» компаниясы жүзеге асырып жатқан қара қорғасын мен мыс өндіретін жаңа зауыттың құрылысы қарқын алып келеді. Бұл өндіріс — қаланың өнеркәсіп саласын нығайтуға бағытталған стратегиялық маңызы жоғары жобалардың бірі. Құны 5 млрд теңгені құрайтын ауқымды инвестициялық жобаны іске қосу келесі жылға жоспарланған. Кәсіпорын толық қуатына шыққан кезде шамамен 200 жаңа жұмыс орны ашылып, жылдық өндірістік көлемі 30 мың тонна өнімді құрайтын болады. Бұл — Шымкентте өңдеу өнеркәсібін күшейтіп, жергілікті нарыққа ғана емес, экспорттық әлеуетке де ықпал ететін маңызды қадам. Аталған жоба Мемлекет басшысының өңдеу өнеркәсібін дамыту, экономиканы әртараптандыру және жоғары технологиялы өндірістерді іске қосу жөніндегі тапсырмалары аясында жүзеге асырылуда. Осы бағытта қажетті құжаттарды рәсімдеу, инженерлік коммуникацияларды тарту, инфрақұрылымды қамтамасыз ету және өндірістік процестерді уақтылы аяқтау бойынша жүйелі жұмыстар жүргізілуде. Жауапты құрылымдарға заң аясында барлық қажетті қолдауды көрсету, рәсімдердің мерзімінде орындалуын қамтамасыз ету, өндірістің уақытылы іске қосылуына жан-жақты жағдай жасау тапсырылды. Бұл бастама Шымкенттің өнеркәсіптік әлеуетін айтарлықтай арттырып, қаланың экономикалық тұрақтылығын күшейтеді, жаңа жұмыс орындарының ашылуына және инвестициялық климаттың жақсаруына оң әсер етеді. Шымкенттің дамуы жолында дәл осындай өндірістік жобалардың рөлі ерекше. Олар қала экономикасын жаңа деңгейге көтеріп, индустриялық аймақтардың кеңеюіне, жаңа технологиялардың орнығуына және өңдеу өнеркәсібінің сапалы дамуына серпін береді. Сонымен қатар, бұл өндіріс қаланың инвестициялық тартымдылығын арттырып, өңірге қосымша капитал мен жаңа серпінді жобалардың келуіне жол ашады. Осының барлығы Шымкенттің ұзақ мерзімді даму стратегиясына сай — заманауи, инновациялық, өндірісі дамыған ірі мегаполиске айналу мақсатына қызмет етеді.
Әлемге көзқарасыңды өзгертетін Janalyqtar!
