Түркістан облысында инженерлік-коммуналдық инфрақұрылымды дамыту және тұрғындарды табиғи газбен қамтамасыз ету жұмыстары өңірдің әлеуметтік-экономикалық дамуының маңызды бағыттарының бірі ретінде жүйелі жүзеге асырылып келеді. Мемлекет басшысының халықтың өмір сүру сапасын арттыру, ауылдық аумақтардың әлеуетін көтеру және өңірлердің инфрақұрылымын жаңғырту жөніндегі тапсырмалары аясында облыста газдандыру жобалары кезең-кезеңімен іске асырылуда.
Газбен қамту деңгейін арттыру тұрғындардың тұрмысын жақсартып қана қоймай, әлеуметтік нысандардың тұрақты жұмысын қамтамасыз етуге, кәсіпкерліктің дамуына, экологиялық ахуалды жақсартуға және өңірдің инвестициялық тартымдылығын күшейтуге оң ықпал етеді. Осыған байланысты Түркістан облысында жаңа газ желілерін салу мен қолданыстағы инфрақұрылымды жаңарту жұмыстары қарқынды жүргізілуде.
Бұл бағыттағы жұмыстардың бірі Бәйдібек ауданында жүзеге асырылып жатыр. Бүгінде аудан құрамындағы 11 ауылдық округке қарасты 50 елді мекенде 48 мыңнан астам халық тұрады. Қазіргі таңда олардың 43-і табиғи газдың игілігін көріп отыр. Бұл аудан тұрғындарының басым бөлігінің көгілдір отынға қол жеткізуіне мүмкіндік берген маңызды нәтижелердің бірі.
Қазіргі уақытта Борлысай ауылдық округіне қарасты Қошқарата, Кеңсай және Шұқыршақ ауылдарын табиғи газбен қамту мақсатында құрылыс-монтаж жұмыстары жүргізілуде. Жоба аяқталғаннан кейін аталған елді мекендердің тұрғындары сапалы әрі үздіксіз табиғи газ пайдалану мүмкіндігіне ие болады. Бұл тұрғындардың тұрмыс жағдайын жақсартып, қатты отынға тәуелділікті азайтуға және қоршаған ортаға түсетін экологиялық жүктемені төмендетуге ықпал етеді.
Сонымен қатар, аудандағы Ақтас елді мекенін газдандыру бойынша жобалық-сметалық құжаттама әзірленіп, қаржыландыруға ұсынылған. Қажетті қаражат бөлінген жағдайда, жыл соңына дейін Бәйдібек ауданындағы барлық экономикалық тұрғыдан тиімді елді мекендерді табиғи газбен толық қамтамасыз ету жоспарланып отыр. Бұл ауданның инженерлік инфрақұрылымын жаңа деңгейге көтеретін маңызды қадам болмақ.
Газдандыру жұмыстары ауылдық жерлердегі әлеуметтік нысандардың тиімді жұмыс істеуіне де оң әсерін тигізеді. Мектептер, балабақшалар, денсаулық сақтау мекемелері мен мәдениет нысандарының жылыту жүйесінің тұрақтылығы артып, коммуналдық шығындар оңтайландырылады. Сонымен қатар, табиғи газдың қолжетімді болуы шағын және орта бизнестің дамуына, жаңа өндірістердің ашылуына және инвестиция тартуға қолайлы жағдай қалыптастырады.
Өңірде инфрақұрылымды дамыту барысында экономикалық тиімділік те ескерілуде. Осыған байланысты Бәйдібек ауданындағы Қызылжар, Үсіктас және Байжансай елді мекендері экономикалық тұрғыдан тиімсіз ретінде айқындалған. Дегенмен қалған барлық елді мекендерді көгілдір отынмен қамтамасыз ету бағытындағы жұмыстар жоспарлы түрде жалғасып келеді.
