Түркістан облысы, Сайрам ауданында отбасы құндылығын дәріптеу, аналардың қоғамдағы ерекше орнын бағалау және көпбалалы отбасыларды қолдау бағытындағы жұмыстар жүйелі түрде жалғасып келеді. Мемлекет басшысы Қасым-Жомарт Кемелұлы Тоқаевтың Жарлығына сәйкес, ауданда көпбалалы аналарды мемлекеттік наградалармен марапаттауға арналған салтанатты іс-шара өтті.
Аталған рәсімде көпбалалы аналардың бала тәрбиесіндегі еңбегі, отбасы берекесін қалыптастырудағы рөлі және қоғам дамуына қосып отырған үлесі ерекше атап өтілді. Салтанатты жиын барысында аудан әкімінің орынбасары Сержан Дауылбайұлы аналарды құттықтап, мемлекет тарапынан көрсетіліп отырған жоғары құрметтің маңыздылығына тоқталды. Іс-шара барысында көпбалалы аналарға «Алтын алқа» және «Күміс алқа» мемлекеттік наградалары салтанатты түрде табысталды.
Бұл жолы Сайрам ауданынан 22 ана мемлекеттік марапатқа ие болды. Оның ішінде 4 ана жеті және одан да көп бала тәрбиелегені үшін «Алтын алқа» төсбелгісімен марапатталса, 18 ана «Күміс алқа» иегері атанды. Аталған марапаттар – аналардың отбасындағы ерен еңбегін, бала тәрбиесіне қосқан зор үлесін және қоғамдағы маңызды орнын мойындаудың айқын белгісі.
Көпбалалы аналарды қолдау – еліміздегі әлеуметтік саясаттың маңызды бағыттарының бірі. Ана мен балаға қамқорлық көрсету, отбасы институтын нығайту, демографиялық өсімді ынталандыру және көпбалалы отбасылардың әл-ауқатын арттыру бағытында мемлекет тарапынан бірқатар шаралар жүзеге асырылуда.
Сайрам ауданы – отбасы құндылықтары берік қалыптасқан, халық саны тығыз орналасқан ірі өңірлердің бірі. Мұнда көпбалалы отбасыларға қолдау көрсету, олардың әлеуметтік жағдайын жақсарту және қоғамдағы белсенділігін арттыру бағытындағы жұмыстар тұрақты жүргізіліп келеді. Ана еңбегін бағалау, оларға құрмет көрсету – тек марапаттау рәсімі ғана емес, жас ұрпақты тәрбиелеудегі ата-аналардың еңбегін мойындаудың маңызды көрінісі.
Бүгінде Сайрам ауданында 12 978 көпбалалы ана тұрады. Олардың қатарында мемлекеттік марапаттарға ие болған аналар саны да көп. Атап айтқанда, 129 анаға «Батыр ана» атағы берілсе, 3 863 ана «Алтын алқа» және 5 026 ана «Күміс алқа» төсбелгісінің иегері атанған. Сонымен қатар, 355 ана І және ІІ дәрежелі «Ана даңқы» орденімен марапатталған.
Мұндай көрсеткіштер Сайрам ауданында отбасы институтының маңыздылығын, аналарға деген құрметтің жоғары деңгейін көрсетеді. Көпбалалы аналардың еңбегі – тек отбасы аясындағы міндет емес, елдің әлеуметтік және рухани дамуына қосылған үлкен үлес.
Аналардың бала тәрбиесіндегі еңбегі мен отбасындағы жауапкершілігін бағалау арқылы қоғамда мейірімділік, сыйластық және адамгершілік құндылықтары нығая түседі. Сондықтан мемлекеттік наградалармен марапаттау рәсімдері аналарға көрсетілген құрмет қана емес, өскелең ұрпақты тәрбиелеудегі маңызды еңбекті насихаттайтын тағылымды шара болып табылады.
Сайрам ауданында көпбалалы аналарды қолдау, отбасы құндылықтарын дәріптеу және әлеуметтік бағыттағы жұмыстар алдағы уақытта да жалғасын табады. Бұл бастамалар өңірдегі тұрақты даму мен халықтың тұрмыс сапасын арттыруға бағытталған маңызды қадамдардың бірі болып қала береді.
