Кентау қаласының энергетикалық инфрақұрылымында стратегиялық рөл атқаратын «Кентау Сервис» мемлекеттік коммуналдық кәсіпорны 1934 жылы құрылып, бүгінде қала тұрғындары мен ұйымдарын жылумен үздіксіз қамтамасыз ететін маңызды мекеме болып отыр. Кәсіпорынның қызметі тек қаланың тұрғындары үшін ғана емес, жалпы Түркістан облысының экономикалық тұрақтылығы мен әлеуметтік дамуында шешуші мәнге ие.
Қазіргі таңда «Кентау Сервис» МКК-да 352 адам еңбек етуде. Олардың арасында тәжірибелі және білікті мамандар көп, солардың бірі – қазандық пен турбина цехының бастығы Азамат Башеков. Оның кәсіби міндеттері қала инфрақұрылымының тұрақтылығын қамтамасыз етуге тікелей ықпал етеді. Әрбір үйге, мектепке, аурухана мен әлеуметтік нысанға жылудың тоқтаусыз жетуі – осы мамандардың кәсібилігінің арқасы.
«Жылу маусымы басталды. Біз маусымға жақсы дайындықпен кірдік. Қазіргі таңда 3 қазандық пен 2 турбина тұрақты жұмыс істеп тұр. Сағатына 8–9 МВт электр қуатын өндіреміз. Жедел персонал ауысыммен жұмыс жасап, әр ауысымда 13–14 адам кезекшілік етеді», – дейді Азамат Башеков.
Энергия өндірісі үздіксіз еңбек пен жоғары жауапкершілікті талап етеді. Қазандық пен турбинаның әр минуттық жұмысы жүздеген техникалық параметрдің тұрақты бақылауда болуын қажет етеді. Бұл – қаланың тынысын қамтамасыз ететін маңызды тірек. Азамат Башеков басқарған цехтағы қызметкерлер тәуліктің кез келген уақытында өндірістің тұрақты жүруін қадағалайды. Әр қызметкер өз ісінің шебері болып, технологиялық тәртіп пен техникалық қауіпсіздікті қатаң сақтайды.
Кәсіпорынның жұмысы Түркістан облысының индустриялық және әлеуметтік дамуына тікелей әсер етеді. Энергияның тұрақты жеткізілуі өңірдегі өндірістік кәсіпорындардың, бизнес құрылымдарының және әлеуметтік нысандардың үздіксіз жұмыс істеуіне мүмкіндік береді. Бұл өз кезегінде аймақ экономикасының тұрақтылығын нығайтып, инвестициялық тартымдылығын арттырады. Сонымен қатар, кәсіпорын жергілікті тұрғындарға тұрақты жұмыс орындарын ұсынып, еңбек нарығын дамытуға үлес қосады.
«Кентау Сервис» МКК-ның қызметі экономиканың барлық секторында сенімділікті арттырады. Қала энергетикасындағы кәсіби мамандардың тәжірибесі мен шеберлігі – өңірдің өндірістік және әлеуметтік дамуын қамтамасыз ететін маңызды фактор. Осындай жауапты және күрделі саладағы тұрақтылық Түркістан облысының жалпы экономикалық әлеуетін арттыруға, инфрақұрылымның сапалы жұмысын қолдауға және халықтың өмір сапасын көтеруге мүмкіндік береді.
Жалпы алғанда, Кентау энергетикасының тұрақты жұмысы – облыс экономикасын дамытудағы маңызды стратегиялық фактор, ал мамандардың кәсібилігі мен тәжірибесі өңірдің индустриялық әлеуетін арттыруға және ұзақ мерзімді тұрақтылыққа кепілдік береді.
