Қазығұрт ауданы – мал шаруашылығын дамытудың қуатты орталықтарының бірі. Мұнда бүгінде бір мезетте 7 мың бас қой бордақылануда, оның ішінде 4 мың бас – қожалықтың өз төлдері. Бұл – өңірдегі аграрлық сектордың әлеуетін айқын көрсететін көрсеткіштердің бірі.
Аудан шаруалары мал бордақылау ісін жүйелі ұйымдастырып, әр маусым сайын өнімділікті арттыруға күш салып келеді. Қожалықта өсірілетін төлдер алты ай бойы арнайы бордақылау алаңында бағылып, көктем айларында Өзбекстан еліне экспортталады. Ал қалған бөлігі жергілікті нарықта сатылымға шығарылады.
Бұл тәсіл шаруашылыққа қосымша табыс әкеліп қана қоймай, ауыл тұрғындарына тұрақты жұмыс көзі болып отыр.
Қожалықтың басты артықшылығы – толықтай өзіне жеткілікті азық базасының болуы. Шаруалар 500 гектар жерге бидай, арпа, жоңышқа және мақсары егіп, мал азығын толық өздері дайындайды.
Сонымен қатар, арнайы цехта құрама жем өндірісі жолға қойылған. Бұл – сырттан тәуелділікті азайтып, бордақылау кезеңінде шығынды қысқартуға мүмкіндік береді.
Мал шаруашылығындағы мұндай жобалар Қазығұрт ауданының экспорттық әлеуетін арттырып, шетелдік нарықта отандық өнімнің бәсекеге қабілеттілігін көрсетуде. Өзбекстанға жіберілетін тірі мал мен ет өнімі екі ел арасындағы сауда байланысын нығайтып, ауыл шаруашылығы саласының дамуына серпін беріп отыр.
Шаруашылық иелері мемлекет тарапынан көрсетіліп жатқан жеңілдетілген несие мен субсидия тетіктерін тиімді пайдаланып келеді. Бұл ауылдағы кәсіпкерлікті қолдау саясатының нақты нәтижесі деуге болады.
Жергілікті әкімдік пен ветеринарлық қызмет те мал басын көбейту мен аурудан сақтау бағытында тұрақты бақылау жүргізіп отырады.
Қазығұрттағы бұл бордақылау алаңы – тек бір шаруашылықтың табысы емес, тұтас өңірдің аграрлық әлеуетінің көрінісі.Мұндай жобалар арқылы жергілікті ауыл шаруашылығы дамып, экспорт көлемі артып, ауыл халқының тұрмысы жақсарып келеді.Жердің игілігін еңбегімен еселеген шаруалар – ел экономикасының нақты тірегі.
