Қытайдың Гуанчжоу қаласындағы Халықаралық конгресс-көрме орталығында 138-ші Кантон жәрмеңкесі өтті. Ауқымды көрме 1,55 млн шаршы метрлік аумақта ұйымдастырылып, оған 25 мыңнан астам компания өз өнімдерін ұсынды. Әлемнің 200-ден астам елінен келген қатысушылар мен сатып алушылар үшін бұл шара жаңа серіктестік орнатуға және бизнес аясын кеңейтуге зор мүмкіндік болды. Халықаралық деңгейдегі маңызды жәрмеңкеге Түркістан облысы әкімінің орынбасары Нұрбол Тұрашбеков бастаған облыстық делегация да қатысып, инновациялық өнімдермен, заманауи технологиялармен және қайта өңдеу саласындағы жетістіктермен танысты. Делегация мүшелері бірқатар шетелдік компаниялармен өзара ынтымақтастық орнату және тәжірибе алмасу мәселелерін талқылады.
Кантон жәрмеңкесі – қазақстандық кәсіпкерлер үшін экспортты дамытуға бағытталған маңызды алаң болды. Мұнда ұсынылған заманауи өндіріс шешімдері мен цифрлық технологиялар отандық өнімдердің сапасын арттыру мен жаңа нарықтарға шығу ісінде үлгі боларлық тәжірибе ұсынды. Қазақстан Үкіметі соңғы жылдары экспортқа бағдарланған өндірістерді дамыту мен ұлттық өнімдерді халықаралық деңгейде ілгерілетуді басым бағыт ретінде айқындап келеді. Осы орайда кәсіпкерлерге қаржылай және инфрақұрылымдық мемлекеттік қолдау шаралары көрсетілді. Мәселен, сыртқы нарықтарға шығуға ниетті кәсіпорындарға жеңілдетілген несиелер беріліп, логистикалық және сақтандыру тетіктері іске асырылды.
«QazTrade» және «KazakhExport» сынды ұлттық институттар кәсіпкерлерге шетелдік көрмелерге қатысуға, экспорттық келісімшарттар жасауға және өнім сапасын халықаралық стандарттарға сәйкестендіруге жан-жақты қолдау көрсетті. Осындай ірі халықаралық шаралар – қазақстандық бизнес үшін өнімін таныстырумен қатар, жаңа технологияларды меңгеріп, сапаны арттыру мен инновация енгізу жолында тәжірибе жинауға зор мүмкіндік болды. Бұл өз кезегінде еліміздің өнеркәсіп саласының бәсекеге қабілеттілігін арттырып, «Made in Kazakhstan» брендіне деген сенімді күшейтті. 1957 жылдан бері үздіксіз өткізіліп келе жатқан Кантон жәрмеңкесі бүгінде әлемдік экономиканың маңызды бөлігіне айналды. Ал оған қазақстандық делегацияның қатысуы — ұлттық экспортты дамыту мен жаңа серіктестік бағыттарды кеңейту жолындағы нақты қадам болды. Мемлекеттік қолдаудың нәтижесінде қазақстандық кәсіпкерлер халықаралық деңгейде өз өнімдерін таныстырып, әлемдік нарықтағы орнын нығайта түсті. Кантон жәрмеңкесі – соның айқын дәлелі болды.
