Шымкент қаласында Президенттің тапсырмалары аясында тұрғын үймен қамтамасыз ету саласында жүйелі және ауқымды жұмыстар жүргізіліп, қала тұрғындарының өмір сапасын арттыруға, әлеуметтік тұрақтылықты қамтамасыз етуге бағытталған нақты шаралар қолға алынуда. Қаланың тұрғын үй саясаты басым бағыттарға – халықтың баспанаға қолжетімділігін арттыруға, әлеуметтік осал топтарды қолдауға және инфрақұрылымды дамытуға бағытталған. 2025 жылдың алғашқы айларынан бастап қалада жаңа тұрғын үйлердің құрылысын жеделдету жұмыстары басталды. Биыл 3 808 пәтерлі 61 әлеуметтік тұрғын үйдің құрылысы жүргізіліп, жыл соңына дейін қосымша 2 574 пәтерлі 34 тұрғын үй пайдалануға беріледі деп жоспарлануда. Бұл жаңа үйлер тұрғындарға тұрақты және сапалы баспана алуға мүмкіндік беріп қана қоймай, қаладағы инфрақұрылымды жетілдіруге де ықпал етеді. Әлеуметтік осал топтарға арналған тұрғын үй жобалары да кең көлемде іске асырылуда. Биыл 1 523 пәтер әлеуметтік осал санаттағы азаматтарға сатып алынып, баспанаға қолжетімділікті арттыруға қосымша мүмкіндік жасалды. Сонымен қатар, жергілікті бюджет есебінен 388 отбасыға тұрғын үй сертификаттары беріліп, табыс деңгейі төмен азаматтар үшін жаңа пәтер алу мүмкіндігі қамтамасыз етілді. Реновация бағдарламасы аясында апатты деп танылған 12 үйдің орнына 120 жаңа пәтер салынған және тұрғындарға табысталды. Бұл шаралар қаладағы тұрғын үйлер қорын жаңғыртып, қауіпсіз әрі заманауи баспанамен қамтамасыз етуді қамтамасыз етеді. Жалпы, биыл Шымкент қаласында пайдалануға берілетін тұрғын үй көлемі 982 мың шаршы метрге жетеді. Бұл көрсеткіш қаладағы әлеуметтік тұрақтылықты нығайтуға, тұрғындардың тұрмыстық жағдайын жақсартуға және Президенттің Шымкентті дамытуға берген тапсырмаларын орындауға нақты үлес болып отыр. Тұрғын үй саласындағы атқарылып жатқан жұмыстар қаладағы аумақтық даму жоспарының маңызды бөлігі болып табылады. Заманауи тұрғын үйлерді салу мен инфрақұрылымды жаңарту мегаполистің тұрақты дамуын қамтамасыз етіп, тұрғындарға қауіпсіз, қолайлы және жайлы өмір сүру ортасын қалыптастыруға мүмкіндік береді. Бұл бастамалар тұрғындардың әлеуметтік әл-ауқатын арттырумен қатар, қаланың экономикалық әлеуетін күшейтіп, Шымкентті заманауи мегаполиске айналдыруға бағытталған стратегиялық қадам болып табылады.
Әлемге көзқарасыңды өзгертетін Janalyqtar!
