Шымкент қаласында көлік инфрақұрылымын жаңғырту және жол қозғалысы қауіпсіздігін арттыру бағытындағы жобалар кезең-кезеңімен жүзеге асырылуда. Президенттің мегаполисті сапалы жол желісімен қамтамасыз ету, тұрғындардың өмір сүру деңгейін көтеру және қалалық ортадағы жайлылықты арттыру жөніндегі тапсырмаларына сәйкес, қалада бірқатар маңызды инфрақұрылымдық жобалар іске асырылуда. Осы бағыттағы ең соңғы жобалардың бірі – Изенді көшесін Юсупов көшесінен Төлеметов көшесіне дейін ұзарту жұмыстары. Жолдың жалпы ұзындығы 1,9 шақырымды құрап, бүгін ресми түрде автокөлік қозғалысына ашылды. Бұл жобаның негізгі мақсаты – Бәйдібек би даңғылы, Төлеметов көшесі және А-2 айналма жолындағы көлік жүктемесін азайтып, қаланың орталық магистральдарында кептелістерді төмендету. Сонымен қатар, қаланың бірнеше негізгі көшесіне күрделі жөндеу жүргізіліп, олар заманауи стандарттарға сәйкес жаңартылды. Атап айтқанда, Шұбаркөл көшесі (Б. Момышұлы көшесінен Өтегенов көшесіне дейін), Юсупов көшесі (А-2 автожолынан Шұбаркөл көшесіне дейін) және Жаңақоныс көшесі (Өтегенов көшесінен Жаңақоныс көшесіне дейін) толық жөндеуден өтті. Жаңақоныс көшесінде Қошқарата өзені үстінен ұзындығы 15 метр болатын жаңа көпір салынды. Жөндеу жұмыстары барысында жолдардың қозғалыс бөлігі едәуір кеңейтіліп, бұрынғы 3–6 метрден 14 метрге дейін жеткізілді. Жаяу жүргіншілерге арналған жолдар төселіп, заманауи көше жарықшамдары орнатылды. Сондай-ақ, суағарлар, кіреберіс-шығаберіс жолдар жасалып, барлық жол белгілері мен бағдаршамдар қойылып, жол таңбалары толық сызылды. Бұл шаралар жүргізушілерге параллель көшелерді тиімді пайдаланып, қаланың негізгі магистральдарындағы жүктемені азайтуға мүмкіндік береді. Қала әкімі Ғабит Сыздықбеков атқарылған жұмыстың сапалы әрі уақытылы орындалғанын атап өтіп, мердігер ұйымға алғысын білдірді. Жаңартылған жолдар мен инфрақұрылымдық шешімдер Шымкенттің көлік жүйесін дамытудың бір бөлігі болып, тұрғындардың қауіпсіздігі мен ыңғайлылығын қамтамасыз етеді. Сонымен қатар, бұл жобалар мегаполистің заманауи инфрақұрылым стандарттарына сай дамуына, қоғамдық көліктің қолжетімділігін арттыруға және қалалық ортаны абаттандыруға қосымша серпін береді. Осылайша, Изенді көшесін толық жаңарту мен басқа маңызды магистральдарды қайта құру – Президенттің тапсырмаларын жүзеге асыру арқылы Шымкент қаласын қолайлы, қауіпсіз және заманауи мегаполиске айналдыруға бағытталған нақты қадамдардың бірі болып табылады. Жобалардың нәтижесінде қалалық көлік инфрақұрылымы дамып, тұрғындардың өмір сүру сапасы артып, қаладағы урбанистикалық дамуға айтарлықтай үлес қосылуда.
Әлемге көзқарасыңды өзгертетін Janalyqtar!
