Түркістан облысы Созақ ауданында инфрақұрылымды дамытуға бағытталған жүйелі жұмыстар нәтижесінде елді мекендердің ішкі көшелері толық жарықтандырылды. 2025 жылы 143 шақырымды құрайтын ішкі көшелерге түнгі жарық шамдары 100 пайыз орнатылып, аудан аумағының барлық ауылдары мен кенттері заманауи жарық жүйелерімен қамтамасыз етілді.
Аудандағы бұл инфрақұрылымдық жаңарту тек тұрғындардың қауіпсіздігін арттырып қана қоймай, экономикалық дамуға да оң әсерін тигізеді. Жарықтандырылған көшелер мен абаттандырылған орта жергілікті кәсіпкерлік қызметтің дамуына жол ашып, сауда нүктелерінің жұмыс уақытын ұзартуға мүмкіндік береді. Сонымен қатар, туризм мен қызмет көрсету саласындағы инвестициялық тартымдылықты арттырады, тұрғындардың өмір сүру сапасын көтереді.
Аудан орталығы Шолаққорған ауылында орталық маңызы бар Жібек жолы және С.Қожанов көшелерінде толық абаттандыру жұмыстары жүргізілді. 718 дана көше жарығы бағаналары, 167 дана аяқжолға арналған жарық тіректері, 120 дана орындық пен қоқыс жәшіктері орнатылды. Сонымен қатар веложолақтар, суағар жүйелері мен жаңартылған аялдамалар тұрғындардың ыңғайын арттырумен қатар, аудандағы инфрақұрылымдық әлеуетті күшейтті.
Аудан әкімдігінің мәліметінше, бұл жұмыстар жергілікті бюджеттен қаржыландырылып, Созақ ауданын әлеуметтік-экономикалық дамытудың нақты үлгісі болып отыр. Жарықтандырылған ішкі көшелер экономиканың белсенділігін арттырып, шағын және орта кәсіпкерлікті дамытуға серпін беріп, инвестициялық климатты жақсартуға ықпал етеді.
Мұндай инфрақұрылымдық жаңғырту жобалары жергілікті экономиканың тұрақтылығын нығайтып, тұрғындардың өмір сүру сапасын арттырумен қатар, өңірге жаңа инвестиция тартудың алғышарттарын жасайды. Ауданның стратегиялық дамуы мен инфрақұрылымға жүйелі қолдау Түркістан облысының жалпы экономикалық өсіміне нақты үлес қосады.
