Түркістан облысы Созақ ауданындағы Шолаққорған ауылында жаңа тұрғын үй ел игілігіне пайдалануға берілді. «Жеткіншек» шағын ауданында бой көтерген 2 қабатты тұрғын үйде 16 заманауи пәтер орналасқан. Пәтерлердің кілттері апатты жағдайда тұрған үйлердің тұрғындарына табысталып, ауыл халқының қуанышын арттырды. Бұл жоба – Созақ ауданының әлеуметтік инфрақұрылымын дамытудағы маңызды қадам болып отыр.
Жобаны қаржыландыруға «Қазатомөнеркәсіп» ҰАК» АҚ-тың еншілес компаниялары – «КАTКО» БК ЖШС және «Қазатомпром-Сауран» атсалысты. Салтанатты шараға арнайы қатысқан «Қазатомөнеркәсіп» ҰАК» АҚ басқарма төрағасы Мейіржан Юсупов әлеуметтік маңызы жоғары жобаның аудан дамуына қосар үлесін атап өтті. Оның айтуынша, ұлттық компания өңірдегі инфрақұрылымдық және әлеуметтік жобаларды қолдауды алдағы уақытта да жалғастыра береді.
Аудан әкімі Мұхит Тұрысбеков жаңа қоныс иелерін құттықтап, жобаның іске асуына қолдау көрсеткен барлық тараптарға алғыс білдірді. «Апатты үйлердің мәселесін шешу – басты міндеттеріміздің бірі. Облыс әкімінің тапсырмасына сәйкес, бұл жобаны жаңғырту бағдарламасына енгіздік. Қаржы көзін анықтау үшін «Қазатомөнеркәсіп» компанияларымен келіссөздер жүргіздік. Жаңа баспаналарыңыз құтты болсын!» – деді аудан басшысы.
Сонымен қатар «КАTКО» БК ЖШС-нің қаржы жөніндегі директоры Алмас Жанқабыл компанияның әлеуметтік жауапкершілік бағытындағы жұмыстары жалғасатынын жеткізді. Бұл жобаның бір ерекшелігі – мемлекеттік және жеке секторлардың өзара тиімді серіктестігі арқылы жүзеге асырылуы. Жоба тек тұрғындарға жайлы өмір сыйлаумен шектелмей, аудандағы әлеуметтік инфрақұрылымды дамытуға, еңбек нарығын ынталандыруға және жергілікті инвестициялық ахуалды нығайтуға үлес қосады.
Жаңа тұрғын үй заманауи талаптарға сай жабдықталған. Пәтерлер толық инженерлік желілермен қамтылып, ауласы қоршалған. Балалар үшін ойын алаңшасы орнатылған, сыртқы қасбеті металлопанельмен әрленіп, заманауи көрініс алған. Мұндай тұрғын үй жобалары ауыл халқының өмір сүру сапасын арттыруға ғана емес, жергілікті экономикалық дамуға да септігін тигізеді.
Әлеуметтік жобаларды жүзеге асыру арқылы Созақ ауданының тұрғындары қауіпсіз әрі қолайлы баспанамен қамтамасыз етіліп қана қоймай, өңірдегі тұрақты экономикалық даму мен инвестициялық тартымдылыққа серпін беріледі. Бұл – Түркістан облысының әлеуметтік-экономикалық дамуына қосылған нақты үлгі және халық игілігі жолындағы маңызды бастама.
Жалпы, жаңа тұрғын үй жобасы – облыстың әлеуметтік саясатындағы табысты қадамдардың бірі ғана емес, инвестициялық және экономикалық тұрақтылықты арттырудағы маңызды құрал ретінде бағалануда. Құрылыс саласында мемлекеттік-жеке серіктестік моделінің тиімділігі дәлелденіп, алдағы уақытта өңірде осындай жобалар ауқымды түрде жүзеге асырылмақ.
