Түркістан облысының әлеуметтік-экономикалық дамуы тек өндіріс пен инвестиция саласында ғана емес, халықтың өмір сапасын арттыруға бағытталған инфрақұрылымдық жобалар арқылы да айқын көрініс табуда. Соның бірі – Түркістан қаласындағы ойын және спорт алаңшаларының кеңеюі мен толықтай жаңғыртылуы. Бұл жұмыстар өңірдің урбанистикалық дамуын жылдамдатып, тұрғындардың тұрмыс деңгейін жаңа сапаға көтеруде.
Бүгінде Түркістан қаласында 250-ге жуық ойын және спорт алаңшасы халыққа қызмет көрсетіп отыр. Қала әкімдігі балалар мен жасөспірімдердің қауіпсіз әрі қолайлы ортада бос уақытын өткізуі үшін жүйелі түрде инфрақұрылымды жаңартып, жаңа нысандар салуды жалғастыруда. Биылдың өзінде 40 ойын алаңшасы толықтай жаңартылып, олардың жабдықтары заманауи стандарттарға сәйкестендірілді. Әр алаңшада қауіпсіздік талаптары күшейтіліп, тұрғындар үшін қолайлы орта қалыптастырылды.
Сонымен қатар, 2024 жылы 9 жаңа ойын және спорт алаңшасы салынып, қала тұрғындарының игілігіне берілді. Бұл нысандар халықтың сұранысы мен нақты қажеттіліктері негізінде бой көтерген. Атап айтқанда, Қазыбек би, Алтай, М.Әбенова, А.Жангелдин, Мұғалжар, Ш.Уәлиханов, Р.Дастанова көшелерінде балалар алаңшалары; Хақназар хан және Ш.Ниязов көшелерінде заманауи футбол алаңдары пайдалануға берілді. Барлық жобалар ақпан айында басталып, қысқа мерзім ішінде сапалы түрде аяқталғаны қала әкімдігінің жұмысының жүйелілігін көрсетеді.
Алаңшалар тек ойнауға арналған орын емес, қала экономикасына оң әсер ететін маңызды инфрақұрылым. Мұндай нысандардың көбеюі құрылыс секторын қолдайды, жергілікті кәсіпорындардың жұмысын арттырады, жаңа жұмыс орындарын ашады. Сонымен қатар, абаттандырылған аумақтар қаланың инвестициялық тартымдылығын жоғарылатып, туристік әлеуетін нығайтады. Инфрақұрылымы жақсы, қауіпсіз және заманауи қала – инвесторлар үшін де, тұрғындар үшін де маңызды фактор.
Алдағы жылдарға белгіленген жоспар бойынша, 2026 жылға дейін Түркістан қаласының тағы 10 аумағында қосымша ойын және спорт алаңшалары салынады. Бұл – облыстың ұзақ мерзімді даму стратегиясының нақты жүзеге асуының белгісі. Урбанистика, құрылыс, әлеуметтік инфрақұрылым бағыттарындағы мұндай жобалар өңірдің экономикалық белсенділігін күшейтіп қана қоймай, Түркістанды жайлы әрі қауіпсіз қалаға айналдыруға үлкен үлес қосады.
Қала әкімдігі тұрғындарды қоғамдық мүлікке ұқыпты қарауға шақырып, бұзақылық немесе ақаулар байқаған жағдайда 109 нөміріне хабарласуға үндейді. Бұл – қоғам мен биліктің ортақ жауапкершілікке негізделген серіктестігін нығайтудың маңызды қадамы.
Түркістандағы ойын және спорт алаңшаларының жаңаруы – өңірдің әлеуметтік инфрақұрылымының нығайып, экономикалық тұрақтылықтың артып жатқанын дәлелдейтін нақты көрсеткіш. Бұл бастамалар Түркістан облысын озық әрі бәсекеге қабілетті өңір ретінде қалыптастыруға бағытталған ұзақ мерзімді дамудың жарқын мысалы.
