Түркістан облысының экономикалық дамуы мен инвестициялық әлеуетін арттыру бағытында жаңартылатын энергия көздерін енгізу жобалары маңызды орын алуда. Соның аясында облыс әкімі Нұралхан Көшеров «Самұрық-Энерго» АҚ Басқарма Төрағасы Қайрат Мақсұтовпен кездесіп, Түркістанда қуаты 300 МВт күн электр станциясын салу жобасын іске асыру мәселесін талқылады.
Кездесуде облыс басшысы жобаның маңыздылығына тоқталып, оның өңірдің энергетикалық тұрақтылығын қамтамасыз етуге және экономикалық дамуына қосатын үлесін атап өтті:
«Түркістан тек тарихи мұра ғана емес, жаңа даму кезеңіне қадам басқан, инфрақұрылымы дамыған аймақ. Өңірдің энергетикалық қауіпсіздігі мен тұрақты дамуы – стратегиялық басымдықтардың бірі. Электр желілерін жаңғырту, қосымша қуат көздерін енгізу, сондай-ақ жаңартылатын энергия жобаларын іске асыру – экономикалық өсімді қамтамасыз ететін негізгі фактор», – деді Н.Көшеров.
Күн электр станциясының Сауран ауданында салынатын жобасы 317 млн АҚШ долларын құрайды және қуаттылығы 300 МВт-ты құрайды. Жоба іске қосылғаннан кейін облыстың электр энергиясына тәуелділігі азайып, жаңартылатын энергия үлесі едәуір өседі. Бұл өз кезегінде өндірістік кәсіпорындарға, бизнес субъектілеріне және халыққа тұрақты әрі сенімді энергия көзі ретінде қызмет етеді, экономикалық белсенділікті арттырады.
«Самұрық-Энерго» АҚ Басқарма Төрағасы Қайрат Мақсұтов жобаның сәтті жүзеге асуына сенім білдіріп, бірлескен жұмыстарды жалғастыруға дайын екенін жеткізді. Жобаның іске асуы өңірге инвестициялық тартымдылық қосып, жаңа жұмыс орындарын ашуға, инфрақұрылымды жетілдіруге және кәсіпкерлікті дамытуға қосымша мүмкіндік береді.
Түркістан облысы соңғы жылдары индустриялық және энергетикалық жобаларды жүйелі түрде іске асырып, экономиканы әртараптандыруға бағытталған. Арнайы экономикалық аймақтар мен индустриялық парктердің ашылуы, жаңа өндіріс орындарының іске қосылуы және қазақстандық–шетелдік инвесторлармен бірлескен жобалардың жүзеге асуы өңірдің инвестициялық тартымдылығын арттыруда. Жаңартылатын энергия көздеріне салынған ірі жобалар экономикалық өсімді қолдай отырып, Түркістан облысын тұрақты әрі бәсекеге қабілетті өңірге айналдырады.
Қорытындылай келе, Сауран ауданындағы күн электр станциясын салу жобасы – тек энергетикалық қажеттілікті қамтамасыз етумен шектелмей, облыстың инвестициялық және экономикалық дамуына елеулі серпін беретін стратегиялық маңызы бар жоба болып отыр. Бұл бастама Түркістанның тұрақты дамуындағы, инновациялық және жасыл экономикаға бағытталған маңызды қадамы болып есептеледі.
