Түркістан облысында өңірлік кәсіпкерлікті қолдау, өндірісті дамыту және жаңа жұмыс орындарын ашу мақсатында аудандар мен қалаларда жалпы 22 шағын өндірістік парк құрылуда. Қазіргі таңда жалпы аумағы 225,4 гектарды құрайтын алаңдарда 256 өндірістік ғимараттың құрылысы жүргізілуде.
Өндірістік парктер құру барысын облыс әкімінің орынбасары Қанат Қайыпбек төрағалық еткен жиында қарастырып, алаңдарға орналастырылатын жобалар туралы толық талқыланды. Жиында Қанат Қайыпбек құрылыс жұмыстарының сапасы мен мерзімінде аяқталуын қамтамасыз ету, жобаларды тезірек іске қосу бойынша нақты тапсырмалар берді.
– «Облыс әкімінің тапсырмасына сәйкес, өндірістік парктер заманауи талапқа сай әрі бәсекеге қабілетті жобалармен толықтырылуы тиіс. Әр аудан мен қала кемінде 5 өндірістік ғимарат салуы қажет. Ғимараттар қажетті инфрақұрылыммен толық қамтылуы керек. Бұл кәсіпкерлерге көрсетілетін үлкен қолдау», – деді Қанат Қайыпбек.
Жиында аудан және қала әкімдерінің орынбасарлары атқарылып жатқан жұмыстардың барысын баяндап, нақты жобалар бойынша мәлімет берді. Мысалы:
Шардара ауданында шағын өндірістік парк құрылысы үшін 2 гектар жер бөлінген. Онда 6 өндірістік ғимарат орналастырылып, 6 жобаның жалпы инвестициясы 530 млн теңге құрайды. Жоба іске қосылғанда 50 жаңа жұмыс орны ашылады.
Сайрам ауданында 2,4 гектар аумаққа 5 инвестициялық жоба орналастырылмақ, жалпы инвестиция көлемі – 950 млн теңге.
Сауран, Ордабасы, Шардара, Жетісай және Түлкібас аудандарында шағын өндірістік алаңдар салу белсенді түрде жүргізілуде.
Өндірістік парктерде келесі салаларда жобалар іске асырылмақ:
Құрылыс материалдарын өндіру
Пластик, темір және резеңке өнімдері
Жиһаз өндірісі
Жеңіл өнеркәсіп және химия өнімдері
Сүт өнімдерін өндіру
Құрама жем өндірісі
Ауыл шаруашылығы өнімдерін сублимациялық әдіспен кептіру
Жалпы, өндірістік парктерде жүзеге асырылатын 152 жобаның инвестициялық құны – 212,8 млрд теңге. Парктер іске қосылған соң, Түркістан облысында кәсіпкерлікке серпін беріліп, өңдеу өнеркәсібі мен шағын бизнестің үлесі айтарлықтай арта түседі.
Бұл жобалар өңірдің экономикалық дамуын нығайтып, жаңа жұмыс орындарын құруға және жергілікті өндірісті кеңейтуге мүмкіндік береді.
