Түркістан қаласында соңғы жылдары урбанистік даму мен экономикалық әртараптандыруға ерекше көңіл бөлінуде. Қала тек мәдени және рухани орталық ретінде ғана емес, сонымен қатар заманауи инфрақұрылым мен сапалы құрылыс жобалары арқылы аймақтық экономиканың қозғаушы күшіне айналып келеді.
Қазіргі таңда қала аумағында тұрғындар мен қонақтардың қауіпсіз әрі ыңғайлы қозғалысын қамтамасыз ету мақсатында жаяу жүргіншілерге арналған арнайы көпірлер салынуда. Түркістан станциясы тұсында орналасқан ұзындығы 46 метрлік көпірдің құрылысы 90 пайызға, ал Түрік ауылындағы ұзындығы 141,7 метр болатын көпірдің жұмыстары 65 пайызға орындалған. Бұл нысандар пайдалануға берілген соң, көлік қозғалысы мен жаяу жүргіншілер ағыны реттеліп, тұрғындардың қауіпсіздігі айтарлықтай артады.
Сонымен қатар, қала басшысы жаңадан бой көтеріп жатқан Өнер орталығының құрылыс алаңына барып, нысандағы жұмыстардың барысын тексерді. Бүгінгі таңда орталықтың 95 пайызы дайын. Қазіргі кезде анықталған кейбір кемшіліктерді жою шаралары жүргізіліп жатыр. Әкім нысанның сапалы әрі уақытылы аяқталуын ерекше бақылауда ұстау қажеттігін атап өтіп, мердігер мекемелерге нақты тапсырмалар жүктеді.
Бұл жобалар Түркістанның экономикалық және әлеуметтік инфрақұрылымын дамытудың маңызды бөлігі болып табылады. Қаланың құрылыс секторы мен инженерлік инфрақұрылымға салынған инвестициялар өңір экономикасын әртараптандыруға, жаңа жұмыс орындарын ашуға және жергілікті кәсіпорындардың дамуына серпін беруде.
Инфрақұрылымдық жобалардың іске асуы — Түркістанды интеллектуалды және инвестициялық тартымды қалаға айналдырудың нақты қадамы. Заманауи көпірлер, мәдени орталықтар мен қоғамдық кеңістіктердің көбеюі — қала экономикасын тек құрылыс саласы есебінен ғана емес, туризм, қызмет көрсету және шағын бизнес бағыттары бойынша да дамытуға мүмкіндік береді. Түркістан бүгінде елдің рухани ордасынан экономикалық әлеуеті жоғары, заманауи инфрақұрылыммен қамтылған жаңа форматтағы мегаполиске айналып келеді.
