Түркістан облысында өңірлік экономиканы әртараптандыру, кәсіпкерлікті дамыту және өндірістік әлеуетті арттыру бағытындағы жұмыстар жүйелі түрде жүзеге асуда. Соның айқын көрінісі ретінде Түлкібас ауданында шағын өнеркәсіптік аймақтардың құрылысы бастау алды. Майлыкент, Тастұмсық, Балықты және Машат ауылдық округтерінде орналасатын өндірістік нысандар шағын және орта бизнесті қолдауға, кәсіпкерлерге қолайлы жағдай жасауға бағытталған. Қазіргі таңда бұл аймақтарда инфрақұрылым тарту жұмыстары жүргізілуде — атап айтқанда, су мен электр желілерін жеткізу, жолға тас төсеу және инженерлік жүйелерді дайындау шаралары қолға алынған. Бұл бастама — ауыл кәсіпкерлеріне нақты мүмкіндік. Өйткені жаңа өндірістік аймақтар арқылы өз кәсібін кеңейтуге немесе жаңадан іс бастағысы келетін азаматтарға жер телімдері бөлініп, оған қажетті инженерлік инфрақұрылым толық қамтамасыз етіледі. Мұндай қолдау ауыл ішіндегі тар әрі бейімделмеген орындарда жұмыс істеп келген кәсіпкерлерге кеңістік пен жаңа серпін береді. Жоба нәтижесінде аудан аумағында шағын және орта бизнестің дамуы жеделдеп, жергілікті өнім өндіру көлемі артып, жаңа жұмыс орындары ашылады. Бұл өз кезегінде тұрғындардың табысын көбейтіп, әлеуметтік-экономикалық ахуалды жақсартуға сеп болмақ. Түлкібаста бастау алған бұл өндірістік нысандар тек аудан экономикасына ғана емес, жалпы Түркістан облысының индустриялық-инновациялық дамуына үлес қосатын маңызды қадам болып отыр. Мұндай жобалар өңірдің инвестициялық тартымдылығын арттырып, жергілікті нарықта өнім түрлерінің көбеюіне, сонымен қатар ауылдық аумақтардың тұрақты дамуына жол ашады. Тұтастай алғанда, Түлкібас ауданында қолға алынған өндірістік аймақтар құрылысы — өңірдің экономикалық белсенділігін арттыруға, кәсіпкерлікті жаңа деңгейге көтеруге және халықтың әл-ауқатын жақсартуға бағытталған стратегиялық бастама.
Әлемге көзқарасыңды өзгертетін Janalyqtar!
