Сарыағаш қаласының кіреберіс аумағында өңір экономикасына жаңа серпін беретін ірі жоба – “Өндірістік парк” құрылысы басталды. Жалпы аумағы 6,5 гектарды құрайтын бұл аймақ кәсіпкерлікті дамыту мен өндірістік инфрақұрылымды жетілдірудің маңызды кезеңі болмақ. Қазіргі таңда жоба аумағында жер тегістеу және инженерлік инфрақұрылымға арналған дайындық жұмыстары жүргізілуде. Алдағы уақытта іргетас бетондау мен өндірістік ғимараттардың құрылысын бастау жоспарланып отыр. Аудан әкімі Арман Абдуллаев құрылыс алаңына арнайы барып, жұмыстардың барысын тексеріп, мердігер мекемелерге нақты тапсырмалар берді. Ол жобаны сапалы әрі уақытылы аяқтаудың маңыздылығын атап өтіп, алғашқы өндірістік нысандардың құрылысын бір апта ішінде бастау қажеттігін ескертті. “Өндірістік парк” – Сарыағаш ауданындағы шағын және орта бизнесті қолдау мен экономиканы әртараптандыру мақсатында қолға алынған стратегиялық жоба. Мұнда кәсіпкерлерге инженерлік-коммуникациялық инфрақұрылыммен қамтылған дайын жер телімдері ұсынылады. Парк аумағында азық-түлік өнімдерін өңдеу, жеңіл өнеркәсіп, құрылыс материалдарын шығару және ауыл шаруашылығын қайта өңдеу бағыттарында жұмыс істейтін өндіріс орындарын ашу көзделуде. Бұл өз кезегінде ауданның өндірістік әлеуетін арттырып қана қоймай, инвестиция тартуға және жаңа жұмыс орындарын құруға мүмкіндік береді. Сарыағаш ауданы облыстың экономикалық белсенді аймақтарының бірі ретінде соңғы жылдары бірқатар ірі инфрақұрылымдық жобаларды жүзеге асырып келеді. “Өндірістік парк” соның жалғасы ретінде аймақтың өндірістік және логистикалық инфрақұрылымын жетілдіріп, жергілікті халықты тұрақты жұмыспен қамтуды көздейді. Жоба толық іске қосылған жағдайда ондаған жаңа өндіріс орны ашылып, жүздеген тұрғын жұмыспен қамтылмақ. Сонымен қатар, жаңа кәсіпорындардың құрылуы жергілікті бюджеттің кірісін арттырып, өңірдің әлеуметтік инфрақұрылымын дамытуға қосымша серпін береді. Өңір басшылығының айтуынша, Сарыағаш ауданы соңғы жылдары инвесторлар үшін жоғары әлеуетке ие өңір ретінде қалыптасып келеді. Инженерлік жүйелермен қамтамасыз етілген жаңа “Өндірістік парк” аумағы — кәсіпкерлер үшін тиімді әрі қауіпсіз алаң. Бұл бастама мемлекеттік қолдау мен жеке инвестицияның тиімді үйлесімін көрсетеді. Аудандық кәсіпкерлік және ауыл шаруашылығы бөлімдері жобаның орындалуын тұрақты бақылауда ұстап, бизнес субъектілеріне жан-жақты қолдау көрсетуді жалғастырады.
Әлемге көзқарасыңды өзгертетін Janalyqtar!
