Мақтаарал ауданының ауыл шаруашылығы соңғы жылдары тұрақты даму траекториясына шығып, өндіріс көлемі мен өнімділік көрсеткіштері бойынша айтарлықтай нәтижелерге қол жеткізуде. 2025 жылдың қорытындысы бойынша салада өндірілген жалпы өнім көлемі 85,7 млрд теңгені құрап, өткен жылмен салыстырғанда 17,3%-ға артты. Бұл – ауыл шаруашылығының өңір экономикасындағы жетекші салалардың бірі ретіндегі маңызын айқын көрсететін оң динамика.
Өндірілген өнімнің басым бөлігі егін шаруашылығына тиесілі: егін шаруашылығында 72,1 млрд теңгенің, ал мал шаруашылығында 13,3 млрд теңгенің өнімі өндірілді. Бұл көрсеткіштер өсімдік шаруашылығының аграрлық өндірістегі жетекші рөлін сақтап отырғанын көрсетеді.
Аудан бойынша ауыл шаруашылығына пайдаланылатын жер көлемі 60,3 мың гектарды құрайды. Оның ішінде 1,8 мың гектар алқапқа көкөніс дақылдары егілген. Жер ресурстарын тиімді пайдалану және әртараптандыру саясаты өз нәтижесін беруде.
2025 жылы мақта дақылы 35 132 гектар алқапқа егіліп, 99 072 тонна өнім жиналды. Орташа өнімділік гектарына 28,2 центнер болды. Бақша дақылдары 13 387,8 гектар алқапта егіліп, 313 274,5 тонна өнім берді. Орташа өнімділік гектарына 234,0 центнерге жетіп, саланың әлеуеті жоғары екенін көрсетті.
Көкөніс шаруашылығы да тұрақты дамып келеді. 1 818 гектар алқапқа егілген дақылдардан 45 323 тонна өнім жиналып, гектар өнімділігі 249,3 центнерді құрады. Атап айтқанда, қырыққабат дақылы 520 гектардан 16 791 тонна өнім беріп, орташа өнімділік 322,9 центнерге жетті.
Мал азықтық дақылдар 4 383,3 гектар жерге егіліп, 49 194 тонна өнім берді (орташа өнімділік – 113,6 центнер). Дәнді дақылдар 6 242,2 гектар алқапта егіліп, 36 603,6 тонна өнім алынды, орташа өнімділік 58,6 центнерге жетті.
Жыл басынан бері аудан көлемінде 5 692 тонна ет, 17 644 тонна сүт, 6 581,2 мың дана жұмыртқа өндірілді. Мал шаруашылығы өнімдерінің тұрақты өсуі тұрғындарды азық-түлікпен қамтамасыз етуде маңызды рөл атқарып отыр.
Материалдық-техникалық базаны жаңарту жұмыстары да жүйеленді. 2025 жылы агроқұрылымдар тарапынан 220 жаңа ауыл шаруашылығы техникасы мен 13 қосалқы агрегат сатып алынды. Бұл егін егу, жинау және өңдеу жұмыстарының сапасы мен жылдамдығын арттыруға мүмкіндік берді.
Ағымдағы жылдың қорытындысы бойынша ауыл шаруашылығының жалпы өнім көлемін 102 млрд теңгеге жеткізу жоспарлануда. Бұл мақсатқа жету үшін өндіріс көлемін ұлғайту, өнімділікті арттыру және заманауи технологияларды енгізу бағытында жүйелі жұмыстар жүргізілуде.
