Қаланың тіршілік тынысын қамтамасыз ететін стратегиялық маңызды салалардың бірі – жылу инфрақұрылымы. Бұл жүйенің тұрақты әрі қауіпсіз жұмыс істеуі, ең алдымен, өз ісіне адал, тәжірибелі және жауапкершілігі жоғары мамандардың тынымсыз еңбегінің нәтижесі. Осындай білікті кадрлардың қатарында көпжылдық еңбек жолы мен мол тәжірибесі бар, өз саласының шын мәніндегі шебері – Унгаев Джалил Калибаевич бар.
Джалил Калибаевич коммуналдық және өндірістік салаларда ондаған жылдар бойы еңбек етіп, кәсіби шеберлігімен, тәртіпке беріктігімен және жұмысқа деген жауапкершілігімен ерекшеленіп келеді. Ол 1989–1992 жылдары А.К. Кортунов атындағы Бұхара газ өнеркәсібі техникумында «іштен жанатын қозғалтқыштар» мамандығы бойынша білім алып, техник-механик біліктілігін иеленді. Алған теориялық білімі мен тәжірибесін ол кейінгі еңбек жолында табысты ұштастыра білді.
Еңбек жолын 1984 жылы Союзөзбекгазпром АҚ-да слесарь қызметінен бастаған ол, 1987–1993 жылдары Өзбекбургаз Бұхара бұрғылау басқармасында бұрғылау жабдықтарын жөндеуші слесарь болып жұмыс істеді. Бұл кезең оның кәсіби қалыптасуында үлкен мектеп болды. Кейіннен «Хает» шағын кәсіпорнында, «Бұқарасовхозстрой» тресінде еңбек етіп, 3-дәрежелі слесарьдан басқарушы механик лауазымына дейін көтерілді. Бұл оның ұйымдастырушылық қабілеті мен жауапкершілігінің жоғары екенін дәлелдейді.
1997–2011 жылдары Бұхара мұнай өңдеу зауыты жөндеу-механикалық цехында технологиялық қондырғыларды жөндеу бойынша 4-дәрежелі слесарь болып қызмет атқарды. Ұзақ жылдар бойы бір өндірісте табанды еңбек етуі – оның төзімділігі мен кәсіби адалдығының айғағы. 2012–2013 жылдары Baur Construction ЖШС-де тас қалаушы, ал 2013–2015 жылдары Шымкентгаз МКК құрылыс алаңында жұмысшы болып еңбек етті.
2015 жылдан бастап бүгінгі күнге дейін Қуатжылуорталық-3 МКК магистралды құбырларды пайдалану бөлімшесінде жылу желілеріне қызмет көрсететін 5-дәрежелі слесарь лауазымында абыроймен еңбек етіп келеді. Ол өндірістік тәртіпті қатаң сақтайтын, техникалық қауіпсіздік талаптарын жетік меңгерген, әріптестеріне әрдайым қолдау көрсете білетін беделді маман ретінде ұжым арасында зор құрметке ие.
Қаланың жылу желілерінің үздіксіз әрі сенімді жұмыс істеуінде Джалил Калибаевичтің еңбегі айрықша. Оның кәсіби білімі мен өмірлік тәжірибесі жас мамандарға үлгі, ал адал еңбегі – қоғам үшін үлкен құндылық. Осындай еңбек адамдары ел игілігі үшін аянбай тер төгіп, тұрақтылық пен дамудың берік негізін қалыптастырып келеді.
