Бүгінде Шымкент қаласының тұрақты экономикалық дамуы тек өндіріс пен инвестиция көлемімен ғана емес, адам капиталының сапасымен де тығыз байланысты. Осы тұрғыдан алғанда, денсаулық сақтау саласын жаңғырту – қаланың ұзақ мерзімді әлеуметтік-экономикалық өсіміне бағытталған маңызды стратегиялық қадамдардың бірі. 2026 жылға жоспарланған ауқымды медициналық жобалар Шымкенттің халықаралық стандарттарға жақындауына және инвестициялық тартымдылығының артуына тікелей ықпал етпек. Алдағы кезеңдегі ең маңызды бастамалардың бірі – қаланың Дүниежүзілік денсаулық сақтау ұйымы ұсынған «Салауатты қалалар» Еуропалық желісіне қосылуы. Бұл бастама Шымкентте «Салауатты университет», «Салауатты ауруханалар», «Салауатты жұмыс орындары» және Жастар денсаулық орталықтары сияқты профильдік бағыттарды жүйелі енгізуге мүмкіндік береді. Қаланың денсаулық профилі әзірленіп, ведомствоаралық жұмыс тобы құрылуы – басқару тиімділігін арттырып, денсаулық сақтау саласын экономикалық жоспарлаумен ұштастыруға жол ашады. Медицина инфрақұрылымына салынатын инвестициялар еңбек өнімділігін арттыруға тікелей әсер етеді. 2026 жылы амбулаториялық онкологиялық көмек орталығының ашылуы, №1 және №2 қалалық клиникалық ауруханалар базасында ЧКВ орталықтарының жаңғыртылуы, сүйек кемігін трансплантациялау әдісінің енгізілуі – жоғары технологиялы медицинаның дамуына серпін береді. Бұл өз кезегінде емделу үшін басқа өңірлерге немесе шетелге кететін қаржыны азайтып, қаланың ішкі экономикалық айналымын күшейтеді. Балалар мен жасөспірімдер денсаулығына салынған инвестиция да болашақ экономиканың іргетасы саналады. Мектептерде стоматологиялық кабинеттердің ашылуы, профилактикалық көмектің күшеюі – ұзақ мерзімді перспективада еңбекке қабілетті, дені сау ұрпақ қалыптастыруға бағытталған. Ал мемлекеттік-жекешелік әріптестік аясында «Нефрологиялық орталықтың» салынуы жеке инвестицияларды тарту арқылы медициналық қызмет сапасын арттырудың тиімді үлгісін көрсетеді. Сонымен қатар, емханаларды сенімгерлік басқаруға беру, кең бейінді мейіргерлерді даярлау, жас мамандарды тарту және медициналық кадрлардың біліктілігін халықаралық деңгейде арттыру – қызмет көрсету сапасын жақсартумен қатар, еңбек нарығында жаңа мүмкіндіктер туғызады. Бұл шаралар Шымкентті медицина саласындағы кәсіби мамандар үшін тартымды орталыққа айналдыруға ықпал етеді. Қорытындылай келе, денсаулық сақтау саласын жүйелі жаңғырту – Шымкенттің экономикалық дамуының ажырамас бөлігі. Сапалы медицина, дамыған инфрақұрылым және білікті кадрлар қаланың инвестициялық беделін арттырып, халықтың өмір сапасын жақсартуға және заманауи мегаполис ретінде орнығуына берік негіз қалайды.
