Түркістан облысы инвестициялық әлеуетін арттыру және экономикалық дамуды жеделдету бағытында жүйелі жұмыстар жүргізіп келеді. Осы орайда өңірдің туризм саласын дамытуға арналған жаңа жобалар шетелдік инвесторлардың қызығушылығын тудырып отыр.
Жақында Түркістан қаласында өткен «Turkistan International Investment and Tourism» форумы аясында Түркістан облысының инвестициялық жобалары талқыланып, іске асыруға бағытталған нақты ұсыныстар мақұлданды. Сол шара аясында «Kazakhstan Silk Road International Holdings Group» ЖШС президенті Чан Минг бастаған шетелдік бизнес делегация Түлкібас ауданында болды. Делегация мүшелері өңірдің туристік әлеуетімен танысып, инвестициялық жобаларды зерделеді.
Сапар барысында Иірсу елді мекені маңынан жаңа туристік аймақ құру, сондай-ақ Ақсу шатқалында көру алаңшасын салу жобалары ұсынылып, жан-жақты талқыланды. Сондай-ақ делегация өкілдері туристік инфрақұрылымды дамытуға арналған қонақ үйлер, этноауыл кешені және өзге де туристік нысандар құрылысын қарастырып, жобалардың экономикалық тиімділігін бағалады.
Инвесторлар сондай-ақ «Beibars-Bottlers» зауытының өнімдерімен танысып, кәсіпорынның өндіріс тиімділігін оң бағалады. Жобалар бойынша жүргізілген зерттеулер мен ұсыныстар «Ақсу-Жабағылы» қорығының музейінде жалғасын тапты. Бұл қадам өңірдің туристік өнімдерін әртараптандыруға, туристерді тартуға және жергілікті экономиканы дамытуға мүмкіндік береді.
Түркістан облысы инвестициялық қолдау мен экономикалық дамудың бірлескен тетіктерін пайдалана отырып, туризм саласын дамытуға ерекше көңіл бөліп отыр. Түлкібас ауданындағы жобалар жаңа жұмыс орындарын құруға, туризм секторындағы кәсіпкерлікті арттыруға және өңірдің инвестициялық тартымдылығын күшейтуге бағытталған. Сонымен қатар, халықаралық деңгейде тартылған инвестициялар арқылы туристік инфрақұрылым жетілдіріліп, экономикалық өсімге қосымша серпін берілмек.
Облыс әкімдігі шетелдік инвесторларға қолайлы жағдай жасап, жобаларды іске асыруда толық қолдау көрсетуге дайын екенін атап өтті. Бұл шаралар Түркістан облысының экономикалық дамуын қамтамасыз ету, туристік бағыттағы жобалардың халықаралық стандарттарға сәйкес жүзеге асырылуын қамтамасыз ету және өңірдің жалпы инвестициялық әлеуетін арттыруда маңызды рөл атқарады.
