Түркістан облысы соңғы жылдары тек аграрлық өңір ретінде ғана емес, сонымен қатар индустриялық-инновациялық даму бағытында да айтарлықтай серпін алған аймаққа айналып келеді. Өңір экономикасының жаңа драйвері – өнеркәсіптік өндіріс пен шетелдік инвестициялар. Соның айқын дәлелі – Арыс қаласында франциялық Alstom компаниясымен бірлесіп салынып жатқан электровоз зауытының құрылысы. Арыс қаласында бой көтеріп жатқан электровоз зауыты – Түркістан облысының өнеркәсіп саласындағы ең ірі және стратегиялық жобаларының бірі. Бұл жоба шетелдік инвесторлардың аймаққа деген сенімін көрсетіп қана қоймай, өңірдің индустриялық әлеуетін айтарлықтай арттырады. Францияның Alstom компаниясы – теміржол көлігіне арналған локомотивтер мен жоғары жылдамдықты пойыздар өндірісінде әлемдік көшбасшылардың бірі. Мұндай халықаралық компанияның Түркістан өңірінде өндіріс ашуы – Қазақстанның инвестициялық тартымдылығы мен тұрақты экономикалық саясатының нәтижесі. Жобаның жалпы құны 3,5 миллиард теңге. Зауыт 2,9 гектар аумақта орналасып, жылына 2 000-ға жуық электровоз құрастыруға мүмкіндік береді. Бұл көрсеткіш – аймақтың өнеркәсіп құрылымындағы жаңа деңгей. Зауыт іске қосылғаннан кейін 100-ден астам тұрақты жұмыс орны ашылады, бұл Арыс қаласының әлеуметтік-экономикалық дамуына тікелей ықпал етпек. Сонымен қатар, кәсіпорында теміржол құрамдарына техникалық қызмет көрсету орталығы жұмыс істейді, яғни өндіріс тек құрастырумен шектелмей, сервистік бағытта да дамиды. Арыс қаласының әкімі Қайсар Маңқараев құрылыс алаңына барып, нысандағы жұмыстарды бақылап, мемлекет тарапынан барлық қажетті қолдау көрсетілетінін атап өтті. Қазіргі таңда инженерлік инфрақұрылым тарту, сәулет-жоспарлау және техникалық рұқсаттар толық рәсімделген. Бұл – жобаның жүйелі әрі жоспарлы түрде жүзеге асып жатқанын көрсетеді. Мемлекеттік деңгейде көрсетіліп отырған мұндай қолдау – өңірдегі индустриялық аймақтардың дамуына және инвестициялық жобалардың жүзеге асуына қолайлы жағдай туғызуда. Бұрын көбіне ауыл шаруашылығымен танылған Арыс қаласы бүгінде өнеркәсіптік бағытқа бет бұрған жаңа экономикалық аймаққа айналуда. Электровоз зауыты іске қосылғаннан кейін қалада логистикалық инфрақұрылым, сервистік қызметтер мен көлік-инженерлік бағыттар да қарқынды дамиды деп күтілуде. Бұл өз кезегінде өңірлік экономика құрылымын әртараптандырып, жаңа салық түсімдері мен әлеуметтік тұрақтылыққа жол ашады. Түркістан облысы бүгінде туризм, ауыл шаруашылығы, шағын және орта бизнеспен қатар өнеркәсіптік өндірісті дамыту арқылы экономикалық теңгерімділікті қалыптастыруда. Арыс қаласында салынып жатқан Alstom электровоз зауыты – осы бағыттағы нақты қадамның көрінісі.
Әлемге көзқарасыңды өзгертетін Janalyqtar!
