Түркістан облысында ауыл шаруашылығын дамыту және суармалы жерлерді тиімді пайдалану мақсатында 62 шақырымнан астам арық каналдарын бетонмен қаптау жұмыстары қарқынды жүргізілуде. Жетісай, Мақтаарал, Отырар және Созақ аудандарында жүзеге асырылып жатқан бұл жобалар инвестициялық бағдарламалар аясында іске асырылуда.
Жобаның басты мақсаты – суармалы жерлерге су жеткізуді жақсарту және егістік алқаптарының өнімділігін арттыру. Каналдарды бетондау арқылы су тасымалы кезінде судың шығынын азайту, оның көлемін және жылдамдығын арттыру көзделеді. Жобаның тағы бір ерекшелігі – реконструкция жұмыстары қыркүйектен желтоқсанға дейінгі вегетацияаралық кезеңде жүргізіліп, суару маусымында егістік жұмыстарына кедергі келтірілмейді.
Жоспарланған және іске асырылып жатқан жобалар:
- 2026 жылы Отырар ауданында «Ақарық» каналы (3,39 км) және «Серібек» каналы (5 км) толық реконструкцияланады.
- Созақ ауданында «Шұқырой» каналы (15 км) жаңартылмақ.
- 2027 жылы Жетісай ауданындағы «K-25-12» каналы (7,04 км) бетондалатын болады.
- Мақтаарал ауданында жалпы ұзындығы шамамен 32 км болатын «K-15» және «K-17» каналдары 2028 жылға дейін жаңартылып, бетондау жұмыстары аяқталады.
Су ресурстары және ирригация министрі Нұржан Нұржігітовтың айтуынша, бұл жобалар ауыл шаруашылығының дамуына және жергілікті тұрғындардың өмір сапасын жақсартуға елеулі әсер етеді. Реконструкцияланған каналдар арқылы су тасымалдау тиімділігі арттырылып, су ресурстары үнемделеді, жердің тұрақты әрі өнімді пайдаланылуы қамтамасыз етіледі.
Экономикалық тұрғыдан алғанда, жобаның іске асуы облыс ауылшаруашылық секторын жаңа деңгейге көтеруге мүмкіндік береді. Суармалы жерлердің тиімділігі артқан сайын дақылдардың өнімділігі өседі, агроөнеркәсіптік кәсіпорындар мен фермерлердің табысы көбейеді, ауылдық жерлердегі жұмыспен қамтылу деңгейі артады. Сонымен қатар, жаңартылған инфрақұрылым инвестициялық тартымдылықты арттырып, өңірге жаңа жобаларды тартуға мүмкіндік береді.
Түркістан облысында жүзеге асырылып жатқан каналдарды жаңғырту жобасы – инфрақұрылымды дамыту, су ресурстарын үнемдеу және ауыл шаруашылығын индустриалды деңгейде қолдау бағытындағы стратегиялық бастамалардың нақты көрінісі. Бұл ауқымды жұмыс ауылдық жерлердің экономикалық әлеуетін арттырып, өңірдің тұрақты дамуына жаңа серпін береді.
