Түркістан облысында тұрғындарды қолжетімді баспанамен қамтамасыз ету, заманауи қалалық ортаны қалыптастыру және әлеуметтік инфрақұрылымды дамыту бағытындағы жұмыстар жүйелі түрде жүзеге асырылып келеді. Өңірде тұрғын үй құрылысының көлемі жыл сайын артып, халықтың өмір сүру сапасын жақсартуға және қалалардың сәулеттік келбетін жаңғыртуға басымдық берілуде.
Осы бағытта Түркістан қаласында биыл ауқымды тұрғын үй жобалары іске асырылуда. Әкімшілік-іскерлік орталығында салынып жатқан 5 қабатты 22 тұрғын үйдің 13-інің құрылысы толық аяқталып, пайдалануға беру рәсімдері жүргізілуде. Қалған 9 тұрғын үйді жыл соңына дейін тұрғындардың игілігіне беру жоспарланған.
Жалпы аумағы 7,74 гектарды құрайтын тұрғын үй кешенінде 880 пәтер қарастырылған. Жобалар тұрғындарды баспанамен қамтамасыз етумен қатар, жайлы әрі қауіпсіз өмір сүру ортасын қалыптастыруға бағытталған. Осы мақсатта тұрғын үйлердің аумағында балалар ойын алаңдары, спорт алаңдары, автотұрақтар және өзге де әлеуметтік инфрақұрылым нысандары салынуда.
Тұрғын үй құрылысының қарқынды жүргізілуі халықтың баспанаға деген сұранысын азайтып қана қоймай, құрылыс индустриясының дамуына, жаңа жұмыс орындарының ашылуына және өңір экономикасының белсенділігін арттыруға ықпал етуде. Сонымен қатар инженерлік-коммуникациялық желілер мен әлеуметтік нысандардың қатар дамуы жаңа тұрғын аудандардың толыққанды өмір сүруіне мүмкіндік береді.
Қалада қоғамдық кеңістіктерді дамыту бағытында да маңызды жобалар жүзеге асырылуда. Солардың бірі – жаңа қала аумағында салынатын Рәміздер алаңы. Аталған жоба Түркістанның сәулеттік келбетін жаңғыртып, тұрғындар мен қонақтар үшін заманауи қоғамдық кеңістік қалыптастыруға мүмкіндік береді. Мұндай нысандар қаланың туристік тартымдылығын арттырып, қоғамдық және мәдени іс-шараларды өткізуге қолайлы жағдай жасайды.
Түркістан облысында тұрғын үй құрылысы мен қалалық инфрақұрылымды кешенді дамытуға бағытталған жобалар өңірдің әлеуметтік-экономикалық өсімінің маңызды драйверіне айналып отыр. Қолжетімді баспананың көбеюі, әлеуметтік және инженерлік инфрақұрылымның қатар дамуы тұрғындардың әл-ауқатын арттырып, өңірдің инвестициялық тартымдылығын күшейтуге және Түркістанның заманауи, жайлы әрі тұрақты дамып келе жатқан қала ретінде қалыптасуына негіз болуда.
