Түркістан облысы бүгінде елдің азық-түлік қауіпсіздігін қамтамасыз етуде және өзін-өзі экономикалық тұрғыдан қамтуда маңызды аймаққа айналып отыр. Соңғы жылдары өңірде ауыл шаруашылығына ерекше серпін беріліп, нақты нәтижеге бағытталған жобалар мен бағдарламалар жүзеге асуда. Бұл – мемлекеттің жүйелі қолдауы мен жергілікті шаруалардың қажырлы еңбегінің жемісі.
Биыл өңірдің агросаласына 48,5 млрд теңге қаржы бөлінді. Оның 43,3 млрд теңгесі облыстық бюджеттен, ал 5,2 млрд теңгесі үкіметтік резервтен бағытталды. Бұл қаржы ауыл шаруашылығын қолдау мен өнімділікті арттыруға, сонымен қатар өңірдің ішкі қажеттіліктерін өз күшімен қамтамасыз етуге мүмкіндік беріп отыр. «Басым дақылдарды субсидиялау» бағдарламасы аясында жылыжай шаруашылықтары кеңейіп, өнім көлемі айтарлықтай өсті. 2023 жылы 78 мың тонна өнім алынған болса, биыл бұл көрсеткіш 101,5 мың тоннаға жетті. Бұл – Түркістан облысының азық-түлік нарығында өзіндік өндірісі есебінен тұтыну тепе-теңдігін сақтап отырғанын көрсетеді.
Өңірдің мал шаруашылығы саласы да тұрақты дамып келеді. Асыл тұқымды мал басының көбеюі мен өнім сапасының артуы – шаруалардың тиімді менеджментке және заманауи технологияға көшуінің нәтижесі. Бүгінгі таңда облыс еліміздегі ірі қараның 13%, ұсақ малдың 22%, жылқының 11% және түйенің 14% өсіру көрсеткішіне ие. Бұл Түркістанды республикадағы ең ірі аграрлық аймақтардың бірі ретінде айқындайды. Сонымен қатар, қайта өңдеу саласы қарқынды дамып, өңір экономикасының өзін-өзі қамтамасыз ету әлеуетін арттырып отыр. 2023–2025 жылдары өңдеуші кәсіпорындарды қолдауға 4,15 млрд теңге бөлініп, ауыл шаруашылығы өнімдерін өңдеу көлемі мен экспорттық әлеуеті өсті. Нәтижесінде, жергілікті өндіріс есебінен ішкі нарықтағы азық-түлік бағасы тұрақтанып, өңірдің экономикалық тәуелсіздігі күшейді.
Мемлекеттік қолдау мен шаруалардың адал еңбегі үйлесім тапқан сәтте, ауылдағы тұрмыс сапасы артып, жаңа жұмыс орындары ашылуда. Түркістан облысы бүгінде өзін-өзі азық-түлікпен қамтамасыз етіп қана қоймай, басқа өңірлерге де өнім жеткізетін республикалық аграрлық хабқа айналып келеді. Ауыл еңбегінің осындай табысты нәтижелері өңірдің әлеуметтік-экономикалық тұрақтылығын қамтамасыз етіп, жалпы ел экономикасының іргесін нығайтуға айтарлықтай үлес қосып отыр.
