Құмкент ауылдық округінде тұрғындардың әлеуметтік және спорттық өмірін жақсартуға бағытталған бірқатар нысан пайдалануға беріліп, ауыл халқы қос бірдей қуанышқа куә болды. Атап айтқанда, жабық үлгідегі кіші футбол алаңы мен «Белсенді ұзақ өмір және тең қоғам» орталығы ресми түрде ашылып, ауыл тұрғындарына жаңа мүмкіндіктер сыйлады.
Жабық кіші футбол алаңы барлық халықаралық стандарттарға сай жабдықталған. Мұнда жасанды төсеніш төселген футбол алаңы, жарықтандыру жүйесі, ойыншыларға арналған жылы киім ауыстыратын бөлмелер қарастырылған. Алаңның аумағы толық асфальтталып, абаттандыру және көгалдандыру жұмыстары жүргізілді. Жаңа спорт нысаны ауыл тұрғындарына, әсіресе жас буынға спортпен тұрақты айналысуға және салауатты өмір салтын қалыптастыруға мүмкіндік береді.
Сонымен қатар, ауылда ашылған «Белсенді ұзақ өмір және тең қоғам» орталығы ерекше әлеуметтік мәнге ие. Жаңа орталықта 10 адам тұрақты жұмыспен қамтылды. Нысан зейнет жасындағы ардагерлер мен 18 жастан асқан ерекше қажеттілігі бар азаматтарға арналған, бір мезетте 30 адамға дейін қызмет көрсетуге мүмкіндік бар. Сондай-ақ, Қызылкөл елді мекенінің қариялары да орталық қызметін пайдалана алады.
Орталықта тұз шахтасы, психологиялық терапия бөлмесі, дене шынықтыру залы, оқу және демалыс бөлмелері, массаж кабинеті, бильярд және шахмат ойындарына арналған орындар, сонымен қатар шәй ішіп, еркін демалуға арналған асүй жабдықтары қарастырылған. Мұндай кешенді қызметтер тұрғындардың денсаулығын жақсартуға, психологиялық күйін көтеруге және әлеуметтік белсенділігін арттыруға бағытталған.
Жиын соңында тұрғындар орталықтың ішін аралап, ұсынылатын қызмет түрлерімен танысты және өз ризашылықтарын жеткізді. Ауыл тұрғындарының бұл бастамадан көретін пайдасы – әлеуметтік қызметтерге қолжетімділіктің артуы, спортпен айналысуға жағдайдың жасалуы және өмір сапасының жақсаруы.
Айта кетейік, биыл дәл осындай орталық аудан орталығынан бөлек, Созақ ауылында да ашылды. Бұл жұмыстар әлеуметтік саланың әлеуетін арттырып, ардагерлер мен ерекше қажеттілігі бар азаматтарға көрсетілетін қызметтің қолжетімділігін кеңейтуде. Сонымен қатар, мұндай жобалар жергілікті экономикаға да оң әсерін тигізеді: құрылыс, жабдықтау және қызмет көрсету салаларында жаңа жұмыс орындары ашылып, ауылдық жердегі экономикалық белсенділік артады.
Құмкенттегі жаңа нысандар облыстың әлеуметтік-экономикалық дамуына үлес қосып, тұрғындардың өмір сапасын арттыруға және ауылдық инфрақұрылымды жаңғыртуға бағытталған нақты және маңызды қадамдар болып отыр. Жаңа спорттық және әлеуметтік орталықтар ауыл тұрғындарының денсаулығын нығайтып, белсенді өмір салтын қалыптастыруға, сондай-ақ жергілікті экономика мен қызмет көрсету секторын дамытуға ықпал етеді.
