Түркістан облысының экономикалық әлеуетін арттыру, жаңа өндіріс орындарын ашу, инвестициялық жобаларды қолдау және кәсіпкерлік бастамаларды дамыту бағытында Сайрам ауданында жүйелі жұмыстар жүзеге асырылуда. Өңірдің өндірістік қуатын арттыру, инвесторлар үшін қолайлы жағдай қалыптастыру және кәсіпкерлік субъектілерінің мәселелерін тиімді шешу – аудан дамуының негізгі басым бағыттарының бірі.
Осы бағыттағы жұмыстар аясында Қазақстан Республикасы Бас прокурорының бастамасымен жүзеге асырылып жатқан «Invest Caravan» жобасы шеңберінде Сайрам ауданында инвесторлармен және өндірістік кәсіпорын өкілдерімен кездесу өтті. Жобаның басты мақсаты – инвестициялық жобаларды жүзеге асыру барысында туындайтын мәселелерді анықтау, кәсіпкерлерге құқықтық түсіндіру жұмыстарын жүргізу және өндіріс орындарының тұрақты жұмыс істеуіне қажетті жағдай жасау.
Іс-шара барысында аудан аумағында орналасқан бірқатар ірі кәсіпорындардың жұмысымен танысып, олардың өндірістік мүмкіндіктері, даму жоспарлары және алдағы міндеттері талқыланды. Кездесулер барысында кәсіпкерлердің ұсыныстары тыңдалып, өндірісті кеңейту, жаңа жұмыс орындарын ашу және инвестициялық жобаларды тиімді сүйемелдеу мәселелеріне ерекше назар аударылды.
Сайрам ауданындағы өндірістік әлеуеті жоғары кәсіпорындардың бірі – арнайы автокөлік техникасын құрастыратын «TOKESH TECH TURKESTAN» жауапкершілігі шектеулі серіктестігі. Кәсіпорынның инвестициялық құны 3,2 млрд теңгені құрайды. Заманауи өндірістік базаға ие зауыт жылына 500 дана арнайы техникалық көлік шығаруға мүмкіндік береді. Бүгінде өндіріс орнында 35 адам тұрақты жұмыспен қамтылған.
Аталған кәсіпорынның дамуы өңірдегі машина жасау саласының ілгерілеуіне, отандық өндірістің үлесін арттыруға және жаңа жұмыс орындарын құруға мүмкіндік береді. Арнайы техникаларды жергілікті жерде өндіру экономиканың әртараптануына және өнеркәсіптік әлеуеттің нығаюына оң әсер етуде.
Сондай-ақ, аудандағы ірі жобалардың бірі – «KAZ ECO MEAT» ЖШС ет өңдеу кәсіпорны. Инвестициялық құны 4,5 млрд теңгені құрайтын өндіріс орны мал шаруашылығы өнімдерін терең өңдеуге бағытталған. Кәсіпорында 70 адам еңбек етеді. Өндірістік қуаты жылына 30 мың тоннаға дейін ет өнімдерін өңдеуге жетеді.
Ет өңдеу саласының дамуы Түркістан облысының агроөнеркәсіптік кешенін нығайтуға, ауыл шаруашылығы өнімдерінің қосылған құнын арттыруға және экспорттық мүмкіндіктерді кеңейтуге ықпал етеді. Кәсіпорын өнімдерінің бір бөлігі ішкі нарықты қамтамасыз етуге бағытталса, қалған бөлігі сыртқы нарыққа шығарылып, өңірдің экспорттық әлеуетін арттыруға үлес қосуда.
Сонымен қатар, Манкент ауылында орналасқан «NURYM GROUP» ЖШС құрама жем өндіру зауыты да аудан экономикасына өзіндік үлесін қосып келеді. Инвестициялық құны 2 млрд теңгені құрайтын кәсіпорында 12 адам тұрақты жұмыспен қамтылған. Өндіріс орны сағатына 20 тоннаға дейін құрама жем шығаруға қауқарлы. Бұл жоба мал шаруашылығы саласын дамытуға, ауыл шаруашылығы өнімдерінің өндірістік тізбегін қалыптастыруға мүмкіндік береді.
Жалпы, Сайрам ауданында жүзеге асырылып жатқан инвестициялық жобалар экономиканың түрлі салаларын қамтып, өндірістік белсенділікті арттыруға бағытталған. Өнеркәсіп, ауыл шаруашылығы және қайта өңдеу бағытындағы кәсіпорындардың көбеюі өңірдің экономикалық тұрақтылығын нығайтып, халықты жұмыспен қамту деңгейін арттыруға ықпал етеді.
«Invest Caravan» жобасы аясындағы жұмыстар инвесторлар мен мемлекеттік органдар арасындағы ашық байланысты нығайтып, кәсіпкерлерге қолдау көрсету тетіктерін жетілдіруге мүмкіндік береді. Инвестициялық жобаларды жан-жақты сүйемелдеу, өндіріс орындарының мәселелерін жедел шешу және кәсіпкерлік бастамаларды қолдау арқылы Сайрам ауданында жаңа экономикалық мүмкіндіктер қалыптасуда.
Алдағы уақытта да ауданда инвестиция тарту, жаңа өндірістер ашу және кәсіпкерлік саланы дамыту бағытындағы жұмыстар жалғасып, Түркістан облысының әлеуметтік-экономикалық өсіміне серпін беретін болады.
