Түркістан қаласында өңірдің туристік әлеуетін арттыруға, заманауи демалыс мәдениетін қалыптастыруға және қала тұрғындары мен қонақтарына қолайлы жағдай жасауға бағытталған жаңа жағажай пайдалануға берілді. Орталық Азияда теңдесі жоқ Есу арнасының бойында орналасқан жаңа демалыс аймағы – Түркістанның қарқынды дамып келе жатқан туристік инфрақұрылымының тағы бір маңызды нысаны. Бұл жоба Мемлекет басшысы жүктеген туризм саласын дамыту, халықтың өмір сүру сапасын жақсарту және өңірдің инвестициялық тартымдылығын арттыру міндеттерін іске асыруға бағытталған жұмыстардың нақты нәтижесі болып табылады.
Соңғы жылдары Түркістан қаласында халықаралық талаптарға сай туристік және мәдени нысандар бой көтеріп, инженерлік және әлеуметтік инфрақұрылым жаңартылып келеді. Нәтижесінде қала тек тарихи-рухани орталық ретінде ғана емес, заманауи туристік бағыттардың біріне айналып отыр. Жаңа жағажайдың ашылуы осы жұмыстардың заңды жалғасы болып, тұрғындар мен туристерге жаз мезгілінде сапалы әрі қауіпсіз демалыс ұйымдастыруға мүмкіндік береді.
Жағажайдың ашылу салтанатына Түркістан қаласы әкімінің орынбасары Аманжол Бақытжанұлы қатысып, жаңа демалыс орны өңірдегі туризмді дамытуға, халықтың бос уақытын тиімді ұйымдастыруға және қаланың әлеуметтік инфрақұрылымын жетілдіруге қосылатын маңызды үлес екенін атап өтті. Оның айтуынша, мұндай жобалар Түркістанның туристік әлеуетін арттырып қана қоймай, шағын және орта бизнестің дамуына, жаңа жұмыс орындарының ашылуына және қызмет көрсету саласының кеңеюіне де оң әсерін тигізеді.
Ұзындығы шамамен 1 шақырымды құрайтын жағажай халықаралық қауіпсіздік және жайлылық талаптарына сәйкес жабдықталған. Мұнда суға шомылуға арналған арнайы аймақтар, төрт құтқару мұнарасы, киім ауыстыру бөлмелері, көлеңкелі шатырлар, санитарлық тораптар, демалушыларға арналған жайлы орындықтар қарастырылған. Сонымен қатар балаларға арналған ойын және су сырғанақ алаңдары, жағажай волейболы мен воркаут алаңдары орнатылып, белсенді демалысты ұнататын азаматтарға барлық жағдай жасалған.
Демалыс аймағында катамаран және қайықпен серуендеу қызметтері, банджи-батут және басқа да ойын-сауық нысандары жұмыс істейді. Бұл қызмет түрлері қала тұрғындары мен туристердің бос уақытын мазмұнды өткізуіне мүмкіндік беріп, өңірдегі туристік сервистің сапасын жаңа деңгейге көтеруге ықпал етеді. Жағажайдың инфрақұрылымы әртүрлі жастағы келушілердің сұранысын ескере отырып жоспарланған.
Демалушылардың қауіпсіздігіне ерекше көңіл бөлінген. Су сапасы санитариялық-эпидемиологиялық бақылау және экология саласы мамандарының зертханалық тексерулерінен өтіп, белгіленген талаптарға толық сәйкес келетіні анықталған. Жағажай аумағында арнайы дайындықтан өткен кәсіби құтқарушылар тұрақты кезекшілік атқарады. Сондай-ақ қауіпсіздік талаптарын сақтау мақсатында қажетті ақпараттық белгілер мен ескерту тақтайшалары орнатылып, барлық жағдай қарастырылған.
Жаңа демалыс орнының пайдалануға берілуі Түркістан қаласының туристік тартымдылығын одан әрі арттырып, ішкі және сыртқы туризмнің дамуына тың серпін береді. Бұл өз кезегінде өңір экономикасына инвестиция тартуға, кәсіпкерлік белсенділікті күшейтуге, қызмет көрсету саласының дамуына және жаңа жұмыс орындарының құрылуына ықпал етеді. Сонымен қатар мұндай инфрақұрылымдық жобалар тұрғындардың өмір сүру сапасын жақсартып, отбасылық және бұқаралық демалысты ұйымдастырудың жаңа мүмкіндіктерін қалыптастырады.
Бүгінде Түркістан тарихи-мәдени мұра мен заманауи қалалық инфрақұрылымды үйлестірген, халықаралық деңгейдегі туристік орталық ретінде қарқынды дамып келеді. Жаңа жағажайдың іске қосылуы қаланың рекреациялық әлеуетін күшейтіп, туристердің өңірде ұзақ уақыт аялдауына, жаңа туристік бағыттардың қалыптасуына және қала экономикасының тұрақты дамуына оң әсер етеді.
Ашылу салтанаты мерекелік концерттік бағдарламамен жалғасып, тұрғындар мен қала қонақтары жағажайдың мүмкіндіктерін алғашқылардың бірі болып пайдаланды. Келушілер суға шомылып, қайықтармен және катамарандармен серуендеп, балалар ойын алаңдары мен спорттық нысандардың игілігін көрді.
Айта кетейік, жағажай күн сайын сағат 08:00-20:00 аралығында жұмыс істейді. Кіру құны әлеуметтік қолжетімділік қағидатына негізделген: 6 жасқа дейінгі балаларға – тегін, 7-14 жас аралығындағы балаларға – 500 теңге, ал 15 жастан жоғары келушілер үшін – 1000 теңге. Бұл жаңа демалыс орны тұрғындар мен туристер үшін жазғы маусымдағы ең тартымды орындардың біріне айналады деп күтілуде.
