Түркістан облысында су ресурстарын тиімді басқару, ирригациялық инфрақұрылымды жаңғырту және ауыл шаруашылығы өндірісінің тұрақтылығын қамтамасыз ету бағытындағы жұмыстар кезең-кезеңімен жүзеге асырылуда. Әсіресе, суармалы егіншілік басым дамыған өңірлерде ағын су жүйелерін жаңарту, насос станцияларын заманауи жабдықтармен қамтамасыз ету және су жеткізу сапасын арттыру мәселелеріне ерекше назар аударылып келеді. Бұл жұмыстар Мемлекет басшысының су қауіпсіздігін күшейту, агроөнеркәсіп кешенінің тиімділігін арттыру және ауыл шаруашылығының бәсекеге қабілеттілігін дамыту жөніндегі тапсырмалары аясында іске асырылуда.
Осы бағыттағы маңызды жобалардың бірі Отырар ауданында жүзеге асырылды. Аудандағы ауыл шаруашылығы алқаптарын ағын сумен қамтамасыз ететін стратегиялық маңызы бар «Қызыл Ту» насос станциясы заманауи қуатты жабдықтармен жаңартылды. Жоба өңірдегі суару жүйесінің сенімділігін арттырып, егін шаруашылығын тұрақты сумен қамтамасыз етуге бағытталған маңызды инфрақұрылымдық бастама болып табылады.
Бұған дейін станциядағы ұзақ жылдар бойы пайдаланылған насос қондырғыларының техникалық мүмкіндіктері төмендеп, бірнеше мәрте жөндеу жұмыстары жүргізілгеніне қарамастан, шаруалардың сұранысын толық өтеуге қауқарсыз болған. Соның салдарынан суару кезеңінде ағын су жеткізу барысында қиындықтар туындап, егіншілік жұмыстарының тиімділігіне әсер еткен.
Осы мәселені шешу мақсатында аудан әкімдігі тарапынан «Қазсушар» республикалық мемлекеттік кәсіпорны мен Қазақстан Республикасы Су ресурстары және ирригация министрлігіне нақты ұсыныстар енгізіліп, нәтижесінде насос станциясына өнімділігі жоғары үш жаңа су айдау қондырғысы сатып алынды. Заманауи технологиялармен жабдықталған бұл құрылғылар су өткізу мүмкіндігін едәуір арттырып, су ресурстарын тиімді әрі тұрақты басқаруға мүмкіндік береді.
Жаңа насос қондырғыларының іске қосылуы өңірдегі су тапшылығының алдын алып қана қоймай, ауыл шаруашылығы алқаптарын уақытылы суаруға, егіс өнімділігін арттыруға және шаруалардың өндірістік шығындарын азайтуға оң ықпал етеді. Бұл өз кезегінде ауыл шаруашылығы өнімдерінің көлемін ұлғайтып, өңірдің азық-түлік қауіпсіздігін нығайтуға және аграрлық сектордың экономикалық тиімділігін арттыруға негіз қалайды.
Бүгінде Отырар ауданы үшін ағын су – ауыл шаруашылығының негізгі тірегі саналады. Сондықтан ирригациялық инфрақұрылымды жаңғырту тек суару жүйесін жетілдірумен шектелмей, бүкіл ауданның әлеуметтік-экономикалық дамуына серпін беретін маңызды факторға айналып отыр. Су ресурстарының тұрақты әрі тиімді басқарылуы ауыл тұрғындарының әл-ауқатын жақсартып, агробизнес субъектілерінің өндірістік әлеуетін күшейтуге мүмкіндік береді.
Аудан басшылығы жаңа қондырғылардың үздіксіз әрі тиімді жұмысын қамтамасыз етуге ерекше мән беріп, жауапты сала мамандарына насос станциясының техникалық жай-күйін тұрақты бақылауда ұстауды және жабдықтардың сенімді жұмысын қамтамасыз етуді тапсырды. Бұл алдағы суару маусымын тұрақты өткізіп, егіс алқаптарын қажетті көлемде сумен қамтамасыз етуге мүмкіндік береді.
