Мемлекет басшысының өңірлердің экономикалық әлеуетін арттыру, өндірісті әртараптандыру және заманауи инфрақұрылымды қалыптастыру жөніндегі тапсырмалары Түркістан облысында кезең-кезеңімен жүзеге асырылып келеді. Соңғы уақытта іске асырылып жатқан жобалар көлік қатынасын жақсартып қана қоймай, өнеркәсіп өндірісін дамытуға, су ресурстарын тиімді басқаруға және халықтың тұрмыс сапасын арттыруға оң ықпал етуде.
Өңірдегі маңызды бағыттардың бірі – көлік инфрақұрылымын жаңғырту. Бұл мақсатта Сауран ауданындағы облыстық маңызы бар «Түркістан – Кентау – Еңбекші – Диқан» автомобиль жолының 4 шақырымдық учаскесі күрделі жөндеуден өтіп, пайдалануға берілді. Жаңартылған жол тұрғындардың қауіпсіз әрі қолайлы қатынауына мүмкіндік жасап, ауданаралық байланыстарды нығайтуға және өңірдің әлеуметтік-экономикалық белсенділігін арттыруға жол ашты.
Теміржол саласында да жаңғырту жұмыстары жүйелі жалғасуда. Заманауи талаптарға сай қайта жаңартылып жатқан вокзалдарда инженерлік жүйелер жаңартылып, мүмкіндігі шектеулі азаматтарға арналған қолжетімді орта қалыптастырылуда. Мұндай жұмыстар жолаушыларға көрсетілетін қызмет сапасын арттырып, өңірдің көлік әлеуетін күшейтуге ықпал етеді.
Түркістан облысы аграрлық аймақ болғандықтан, су шаруашылығы саласын дамыту ерекше маңызға ие. Осы бағыттағы ірі жобалардың бірі – ұзындығы 26 шақырымды құрайтын «Найман» каналын қайта жаңғырту. Жоба аясында ондаған гидротехникалық нысан салынып, су шығынын азайтуға және егістік алқаптарын тұрақты сумен қамтамасыз етуге жағдай жасалды. Бұл жұмыстар ауыл шаруашылығы өнімділігін арттырып, су ресурстарын тиімді пайдалануға мүмкіндік береді.
Өнеркәсіп саласында да Түркістан облысында жаңа өндіріс орындары ашылып, инвестициялық жобалар табысты жүзеге асырылуда. Кентау қаласында іске қосылған заманауи кәсіпорын жылына ондаған мың шақырым оптикалық кабель өндіруге қауқарлы. Жоғары технологиялық өндіріс телекоммуникация саласының дамуына үлес қосып қана қоймай, жаңа жұмыс орындарын ашуға мүмкіндік берді.
Сонымен қатар өңірде электр жабдықтарын өндіретін жаңа өндіріс іске қосылып, арнайы техникаларға арналған металл бұйымдарын шығару жолға қойылды. Мұндай жобалар отандық өндірістің бәсекеге қабілеттілігін арттырып, импортты алмастыруға және өңдеу өнеркәсібінің дамуына серпін береді.
Түркістан облысында жүзеге асырылып жатқан инфрақұрылымдық және өндірістік бастамалар өңірдің экономикалық тұрақтылығын нығайтып, халықтың әл-ауқатын арттыруға бағытталған. Жаңа жолдар, жаңартылған су арналары, заманауи өндіріс орындары мен көлік инфрақұрылымының дамуы облыстың инвестициялық тартымдылығын күшейтіп, кәсіпкерлікті дамытуға және жаңа жұмыс орындарын құруға кең мүмкіндік беруде.
Бүгінде Түркістан облысы елдегі қарқынды дамып келе жатқан өңірлердің бірі ретінде әлеуметтік және экономикалық өсімнің жаңа кезеңіне қадам басуда. Мемлекеттік қолдау мен жүйелі жоспарланған жобалардың нәтижесінде облыстың өндірістік әлеуеті артып, көлік-логистика мүмкіндіктері кеңейіп, халықтың өмір сүру сапасы жылдан-жылға жақсарып келеді.
