Шымкент қаласында көлік инфрақұрылымын жетілдіру, қозғалыс қауіпсіздігін күшейту және тұрғындар үшін қолайлы қоғамдық кеңістіктер қалыптастыру бағытындағы жұмыстар қарқынды түрде жүзеге асырылып келеді. Қаланың өсу динамикасына сай көлік жүйесін жаңарту және қалалық орта сапасын арттыру – мегаполистің басым бағыттарының бірі. Қазіргі уақытта Қаратау ауданындағы Бәйдібек би даңғылы мен Төлеметов көшесінің қиылысында ірі жолайрық салу жобасы қолға алынған. Жолайрық көлік жүктемесін азайтып, қозғалыс өткізу қабілетін арттыруға және жол қауіпсіздігін жақсартуға мүмкіндік береді. Нысан пайдалануға берілген соң, көлік ағымын оңтайландыру, жүргізушілердің жолда жүру уақытын қысқарту және қозғалыс қатысушылары үшін қолайлы жағдай жасау жоспарланып отыр. Көлік инфрақұрылымын дамыту аясында Шұбаркөл көшесінің Өтегенов көшесінен Қазиев көшесіне дейінгі бөлігі және Қазиев көшесінің Шұбаркөл көшесінен Арғынбеков көшесіне дейінгі учаскесі көлік қозғалысына ашылды. Бұл жаңа учаскелер қаланың көше-жол желісін бір-бірімен байланыстырып, параллель көшелердегі көлік ағымын реттеуге мүмкіндік береді. Сонымен бірге жаяу жүргіншілер жолдары мен көрші аумақтарды абаттандыру және көгалдандыру жұмыстары да кезең-кезеңімен жалғасады. Алтынсарин көшесінің реконструкциясы да маңызды жобалардың бірі болып табылады. Көшені екі жолақтан төрт жолаққа дейін кеңейту шағынаудандар арасындағы көлік қолжетімділігін арттырып, Бәйдібек би даңғылының жүктемесін төмендетуге бағытталған. Бұл өзгеріс мегаполистегі көлік қозғалысының тиімділігін айтарлықтай жақсартады. Инфрақұрылымдық жобалармен қатар, қала тұрғындары мен қонақтарының демалысын қолдау мақсатында қоғамдық кеңістіктерді дамыту жұмыстары да қолға алынуда. «Астана» алаңындағы ашық аспан астындағы мұз айдындары мен «Мұз сарайы» жанындағы жаппай сырғанау алаңында қыстық демалыстар үшін қолайлы жағдай жасалды. Қала тұрғындары мен қонақтары үшін сырғанау маусымы ресми түрде ашылып, бірнеше мұз алаңы халық игілігіне ұсынылды. Бұл жобалардың барлығы – Шымкентті заманауи, қауіпсіз және тұрғындар үшін қолайлы қалаға айналдыру жолындағы жүйелі қадамдар. Қала инфрақұрылымының жақсаруы, жол желісінің кеңеюі және қоғамдық кеңістіктердің көбеюі – мегаполистің өмір сапасын жаңа деңгейге көтереді.
Әлемге көзқарасыңды өзгертетін Janalyqtar!
