Шымкент қаласындағы «Білім-инновация» №1 лицей-интернатының 10 сынып оқушысы Арсен Алмасхан білім мен технологияны біріктіріп, тың жаңалық ұсынды. 15 жасар жас өнертапқыш жасанды интеллект негізінде бірнеше ауруды бір мезетте анықтайтын бағдарламаны жасап шықты. Бұл жүйе сегіз медициналық көрсеткішті талдап, науқасқа диагноз қоюға бұрын дәрігерлерге қажет болған бірнеше сағат немесе күн орнына небәрі 3 секунд жұмсайды. Арсеннің идеясы – тек уақыт үнемдеу ғана емес, халыққа қолжетімді, тиімді медициналық қызмет көрсету. Жеткіншек бағдарламаны өз қарындасына диагноз ұзақ уақыт қойылмағанына байланысты ойлап тапқанын атап өтті. Ол ашық дереккөздердегі 800 адамның медициналық деректерімен тәжірибе жасап, бағдарлама 80 пайыз дәлдікпен диагноз қойғанын дәлелдеді. Жас өнертапқыш бұл жобаны әрі қарай дамыту үшін команда жинауды жоспарлап отыр. Алдағы уақытта бағдарламаны Қазақстан тұрғындарының медициналық деректерімен ресми түрде толықтыру үшін қуатты компьютерлік ресурстар қажет болады. Егер жоба қолдау тауып, кеңейтілсе, бұл қадам елдегі медициналық диагностика саласын жаңа деңгейге көтеруге мүмкіндік береді. Бұл бастама «Білімді ұлт – көзі ашық ұлт» идеясының нақты көрінісі болып табылады. Жасөспірімнің технология мен ғылымға деген қызығушылығы, аналитикалық ойлау қабілеті және шығармашылық шешім қабылдау дағдылары Қазақстанның цифрлық трансформациясына үлес қосып, жасанды интеллекті медициналық практикаға енгізу арқылы халықтың өмір сапасын жақсартуға септігін тигізеді. Арсеннің жетістігі – жастардың заманауи білім мен инновацияны пайдалана отырып, өз елінің дамуына үлес қосу мүмкіндігі бар екенін дәлелдейтін тамаша мысал. Қазақстандағы «Цифрлы Қазақстан» бағдарламасының мақсаттары аясында жасөспірімнің жобасы – білім мен технологияны тиімді үйлестірудің, медициналық қызметті цифрландырудың, сондай-ақ елдің интеллектуалды әлеуетін арттырудың нақты үлгісі. Мұндай бастамалар жас ұрпаққа ғылымға деген қызығушылықты арттырып, елді цифрлы инновациялар арқылы дамытуға бағытталған нақты қадам болып отыр.
Әлемге көзқарасыңды өзгертетін Janalyqtar!
